नारायण राणेंची अखेर काँग्रेसला सोडचिठ्ठी

‘तुम्ही काय हकालपट्टी करता, मीच पक्ष सोडतो’, असे म्हणत माजी मुख्यमंत्री नारायण राणे यांनी आज (गुरुवारी) घटस्थापनेच्या मुहुर्तावर काँग्रेसला सोडचिठ्ठी दिली आहे. सोबतच त्यांनी काँग्रेसच्या सदस्यत्वाचा आणि आमदारकीचा राजीनामा दिला.

संपूर्ण महाराष्ट्राचा दौरा करून दसर्‍याच्या आधी माझी ताकद काय आहे, हेही दाखवून देतो. दसर्‍याच्या आधी पुढील भूमिका स्पष्‍ट करणार असल्याचे राणेंनी म्हटले आहे. शिवसेनेचे 27 आमदार राजीनामा देण्याच्या तयारीत असल्याचा गौप्यस्फोटही त्यांनी यावेळी केला. कुडाळ येथे पत्रकार परिषदेत राणे बोलत होते. यावेळी राणेंनी काँग्रेसमधील 12 वर्षांची खदखद व्यक्त केली.

दोन वाजता सोनियांना पत्र..अडीच वाजता आमदारकीचा राजीनामा…
काँग्रेस अध्यक्षा सोनिया गांधी यांनी मुख्यमंत्रिपदाचे आश्वासन पाळले नाही, अशी राणेंनी नाराजी यावेळी व्यक्त केली आहे. आता मी काँग्रेसमूक्त झालो असल्याचे ते म्हणाले. दुपारी दोन वाजता सोनिया गांधींना पत्र पाठवले आणि 2 वाजून 35 मिनिटांनी सभापतींकडे आमदारकीचा राजीनामा पाठवल्याचे राणेंनी सांगितले.

माझा उपयोग करून घेता आला नाही…
राणेंनी 26 जुलै 2005 रोजी काँग्रेसमध्ये प्रवेश केला होता. परंतु या 12 वर्षांत माझ्या कामाचा, अनुभवाचा पक्षाने फायदा करुन घेतला नाही, अशा शब्दात राणेंनी काँग्रेसवर आसूड ओढले.

– राज्यातून अनेकजण काँग्रेस सोडण्याच्या तयारीत आहेत.
– अशोक चव्हाण यांना माझी ताकद दाखवून देईल. चक्रव्युहातून बाहेर कसे पडायचे हे मला चांगले माहीत आहे, असा टोलाही राणेंनी यावेळी लगावला.

शिवसेनेचे 27 आमदार राजीनाम्याच्या तयारीत‍…

• राणे काय करणार आहेत, हे त्यांच्या जवळच्याही लोकांनाही माहीत नाही. तीन दिवसांपूर्वी त्यांनी स्वतंत्र समर्थ विकास पॅनलची घोषणा करून ग्रामपंचायत निवडणुकांना सामोरे जाण्याचा निर्णय घेतला होता. आता ते नवे काय सांगणार असल्याने राणे समर्थक गोंधळलेले आहेत. पॅनल काढले असले तरी राणे नवा पक्ष काढण्याची अजिबात शक्यता नाही. भाजपमध्ये जाण्याचे त्यांनी निश्चित केले असून आता आपल्याला काय मिळते, याकडे त्यांचे लक्ष असल्याने ते आज पत्रकार परिषदेत नवीन काहीही सांगता आपल्या नेहमीच्या आवडत्या उद्योगांप्रमाणे काँग्रेस तसेच शिवसेनेवर टीका करण्याचे काम करतील, अशी चर्चा आहे.