उपसरपंच निवडीची सर्वत्र जोरदार तयारी! समसमान बालाबल झाल्यास सरपंचांला निर्णायक मताचा हक्क

        उपसरपंचाची निवडणूक ही ग्रामपंचायतीच्या वार्ड (प्रभाग) मधून निवडून आलेल्या सदस्यांमधून सरपंच यांच्या अध्यक्षतेखाली होईल. या निवडणुकीच्या फेरीत सरपंच यांना मतदानामध्ये भाग घेता येणार नाही. मात्र निवडणुकीच्या या फेरीतील  उपसरपंच निवडणुकीत समसमान मते पडल्यासच सरपंच यांना निर्णायक मत देण्याचा अधिकार आहे. 

      परळी तालुक्यातील 79 ठिकाणी निवडणूक झाली. यातील बोरखेड येथील एक सरपंच पद रिक्त आहे.सरपंच थेट जनतेतून निवडून आले आहेत. आता उपसरपंच निवडणूक होत आहे.  अनेक ग्रामपंचायतीत सरपंच एका पक्षाचे आणि ग्रामपंचायतीत बहुमत दुसर्‍या पक्षाचे अशी स्थिती आहे. अनेक ग्रामपंचायतीत सदस्यांमध्ये सरपंच विरोधकांचे बहुमत आहे. त्यामुळे उपसरपंच निवडणुकीकडे लक्ष लागले आहे. उपसरपंच निवडणुकीत सरपंच यांच्या मताच्या अधिकाराबाबत उलटसुलट चर्चा सुरू होती. 

त्यावर शासनाचे मार्गदर्शन आले आहे. त्यात म्हटले आहे की, शासनाने दि. 1 सप्टेंबर 2017  रोजी  पुनर्प्रख्यापित केलेल्या अध्यादेशानुसार कलम 30 अ-1अ  अन्वये निवडून आलेला सरपंच हा पदसिद्ध सदस्य असेल आणि पोटकलम 33 मध्ये सुधारणा करून पोट-कलम 6(4) अन्वये उपसरपंचाच्या निवडणुकीत समसमान मते पडल्यास सरपंचाला निर्णायक मत देण्याचा हक्क असेल अशी तरतूद केलेली आहे.  

      त्यावरून “उपसरपंच यांची निवडणूक ही ग्रामपंचायतीच्या वॉर्ड (प्रभाग) मधून निवडून आलेल्या सदस्यांमधून सरपंच यांच्या अध्यक्षतेखाली होईल. या निवडणुकीच्या फेरीमध्ये सरपंच यांना मतदानामध्ये भाग घेता येणार नाही. मात्र या फेरीतील उपसरपंचाच्या निवडणुकीत समसमान मते पडल्यासच सरपंच यांना निर्णायक मत देण्याचा अधिकार आहे. त्यानुसार उपसरपंच निवडणुकीबाबत कार्यवाही करावी”, असे मार्गदर्शन  दिले आहे. राज्यातील सर्व जिल्हाधिकारी व सर्व जिल्हा परिषदांच्या मुख्य कार्यकारी अधिकारी यांना ते पाठविले आहे.