अमरावती
डॉ. पंजाबराव देशमुख वैद्यकीय कॉलेज व रुग्णालयातील (पीसीएमसी) चार नवजात बालकांच्या मृत्यूप्रकरणी डॉ. भूषण कट्टा व नर्स विद्या थोरात यांना मंगळवारी अटक करण्यात आली. डॉ. कट्टा यांच्यावर सदोष मनुष्यवधाचा गुन्हा दाखल करण्यात आला आहे. याशिवाय ‘पीडीएमसी’चे अधिष्ठाता डॉ. दिलीप जाणे, डॉ. पंकज बारब्दे व डॉ. प्रतिभा काळे यांना सहआरोपी करण्यात आले आहे.
‘पीडीएमसी’मध्ये दोन मुले व दोन मुली अशा चार बालकांचा रविवारी नवजात शिशू बालक अतिदक्षता विभागात आकस्मिक मृत्यू झाला होता. यानंतर नातेवाइकांनी गोंधळ घालत डॉक्टरांना मारहाणही केली होती. मंगळवारी दिवसभर बालकांच्या मृत्यूमुळे तणावाची परिस्थिती होती. यावेळी आमदार रवी राणा, भाजपचे पदाधिकारीही जमले होते. राणा यांच्या नेतृत्वाखाली पालक व नातेवाइक विभागीय आयुक्त ओमप्रकाश गुप्ता यांच्या कार्यालयात पोहोचले. आमदार राणा व पालकांनी पीडीएमसीचे अधिष्ठाता डॉ. दिलीप जाणे, डॉ. पंकज बारब्दे, डॉ. प्रतीभा काळे, दोन नर्स व मुख्य दोषी डॉ. भूषण कट्टा यांना अटक करण्याची मागणी लावून धरली.
पोटॅशियम इंजेक्शनने घात?
