अंडरवर्ल्डच्या ड्रग्जच्या नशेचा विळखा मुंबईतील कॉलेजेसनाही पडला आहे. ‘मेफेड्रोन’ अर्थात ‘म्याव म्याव’ या नावाने ओळखल्या जाणाऱ्या ड्रग्सच्या विक्रीसाठी अंडरवर्ल्डने शहरातील कॉलेजेसना टार्गेट केल्याची माहिती आठ विद्यार्थ्यांनी मुंबई पोलिसांच्या ‘अँटी नार्कोटिक्स’ विभागाला (एएनसी) दिली. नशेच्या विळख्यात अडकलेल्या या विद्यार्थ्य़ांनी पालकांसह पोलिसांकडे धाव घेतली.‘मेफेड्रोन’चा वाढता धोका लक्षात घेऊन या ड्रग्सची विक्री करणाऱ्यांचे अटकसत्र सतत सुरू असते. मात्र अनेक कॉलेजेसच्या माध्यमातून विद्यार्थीही या नशेच्या विळख्यात अडकत चालले असून त्याची व्याप्ती वाढत असल्याचे या विद्यार्थ्यांच्या कबुलीवरून स्पष्ट होते. ‘हे सर्व विद्यार्थी वांद्रे व इतर उपनगरातील रहिवासी आहेत. पश्चिम उपनगरांतील अनेक कॉलेजेस अंडरवर्ल्ड ऑपरेटर्सच्या निशाण्यावर असल्याचे तपासानंतर स्पष्ट झाले’ अशी माहिती एएनसीतील सूत्राने दिली. या विद्यार्थ्यांच्या जबाबानंतर पोलिसांनी तत्काळ कारवाई करत २६ मे रोजी कामरान जावेद शेख याला अटक केली.
त्यापूर्वी २० मे रोजी पापा बकरी या ड्रग विक्रेत्याला अटक केल्यावरही बरीच माहिती समोर आली होती. ‘मेड्रोफोन ड्रग एवढे महाग आहे की ते सध्या फक्त सधन घरातील व्यक्तींनाच परवडते. पापा बकरीनेही एक ग्रॅमसाठी २ हजार रुपये या भावाने हे ड्रग विकले. गेल्या २ वर्षांपासूव त्याचा हा उद्योग होता. अनेक उच्च-मध्यमवर्गीय घरात त्याने १ ते ३ ग्रॅम ड्रगची होम-डिलीव्हरीही दिली होती ‘ अशी माहिती एका अधिकाऱ्याने दिली. पापा बकरी, कामरान जावेद शेख आणि एजाज सुपारीवाला या तिघानांही वेगवेगळ्या कारवाईदरम्यान डोंगरी येथून अटक करण्यात आली. तसेच त्या तिघांकडूनही ६ कोटी रुपये किमतीचे ३२ किलो मेफेड्रॉन ड्रगही जप्त करण्यात आले.
याप्रकरणी पोलिस सखोल तपाल करत असून ड्रग विक्रीच्या ट्रेंडवरही लक्ष ठेून आहेत. कोकेन विक्री करणारे दक्षिण आफ्रिकनही आता मेफेड्रॉन विक्रीत उतरले आहेत. कोकेनच्या तुलनेत मेफेड्रॉन स्वस्त असल्यानेच त्यांनी आपला मोर्चा या ड्रगकडे वळवला आहे. अंडरवर्ल्ड डॉन दाऊद इब्राहिमची बहीण हसीना पारकरचा नातेवाईक फैसल शेखचाही या व्यवहारात मोठा सहभाग असून तो सध्या फरार आहे. तसेच मोठ्या प्रमाणात ड्रग्ज पुरवठ्याचा व्यवसाय करणारा युसफ चिकनाचाही त्यात सहभागी असल्याचे दिसत आहे.
सर्वात जलद, सर्वात लोकप्रिय! पंढरपूर लाईव्ह वर आपल्या व्यवसायाची जाहिरात द्या.. अल्पदरात!! मुख्य संपादक-भगवान वानखेडे संपर्क- 8308838111
