गेले बरेच दिवस चर्चेत असलेल्या २०० रुपयांच्या नोटेची छपाई रिझर्व्ह बँकेनं सुरू केल्याचं अधिकृत सूत्रांकडून समजतं. नागरिकांचे व्यवहार सोपे व्हावेत, आर्थिक देवाणघेवाण सहजतेनं करता यावी, या उद्देशानं ही नोट छापली जात असून ती लवकरच चलनात येईल.
गेल्या वर्षी ८ नोव्हेंबरला केंद्र सरकारनं नोटाबंदीचा निर्णय घेतला होता. ५०० आणि एक हजाराच्या जुन्या नोटा रद्द करून त्यांनी ५०० आणि २ हजाराची नवी नोट चलनात आणली आहे. त्यापैकी, दोन हजाराची नोट अनेकांसाठी डोकेदुखी ठरतेय. सुटे पैसे देणं अडचणीचं होतंय. त्यामुळे छोट्या चलनाची, २०० रुपयांच्या नोटेची मागणी सर्वच स्तरांतून होत होती. त्यावर सकारात्मक विचार करून, २०० रुपयांची नोट चलनात आणण्याचा निर्णय रिझर्व्ह बँकेनं मार्च महिन्यात घेतला होता.
या पार्श्वभूमीवर, काही आठवड्यांपूर्वीच रिझर्व्ह बँकेनं शासकीय मुद्रणालयांना दोनशे रुपयांच्या नोटा छापण्याचे आदेश दिले आहेत. या प्रक्रियेशी संबंधित असलेल्या दोन अधिकाऱ्यांनी इकॉनॉमिक टाइम्सला ही माहिती दिली. या नोटा जुलैमध्ये चलनात आणण्याचा विचार होता, परंतु त्यात थोडा विलंब होऊ शकतो, असंही त्यांनी स्पष्ट केलं.
सर्वात जलद, सर्वात लोकप्रिय!
