Pandharpur Live- :- प्रत्येक मराठी भाषिक व्यक्तींनी आपापल्या दररोजच्या दिनचर्येत मराठी भाषेचा अधिकाधिक वापर करणे आवश्यक आणि महत्वाचे आहे असे मत येथील सामाजिक कार्यकर्ते व गिनीज बुक ऑफ वर्ल्ड रेकॉर्ड्स होल्डर विश्वविक्रमवीर कवी रवि वसंत सोनार यांनी व्यक्त केले. ते मोडनिंब येथील मारुतीराव हरीराव महाडीक कला व वाणिज्य महाविद्यालयात मराठी राजभाषा दिनाच्या निमित्ताने विद्यार्थी व विद्यार्थीनींना मार्गदर्शन करताना बोलत होते.
वैविध्यपूर्ण आणि वैशिष्ट्यपूर्ण सुश्राव्य अशा कवितांचे गायन करुन पुढे बोलताना कवी रवि सोनार म्हणाले की – मराठी भाषेत दर्जेदार शब्दांचा अफाट खजिना असून आपण बोलण्यात व लिहिण्यात अगदी सहजपणे मराठी भाषेचा उपयोग करू शकतो. शिवाय मराठी ही आपली मातृभाषा असल्याने मराठी भाषेतील प्रत्येक गोष्ट आपल्याला सहजपणे लक्षात घेता येते.
