अहिस्ता अहिस्ता, बुलंदी आणि थोडी सी बेवफाई आदी दर्जेदार सिनेमांचे दिग्दर्शक यांचं बुधवारी रात्री दीर्घ आजाराने निधन झालं.
गेल्या काही महिन्यांपासून आजारी असलेल्या इस्माइल श्रॉफ यांच्यावर मुंबईतील कोकिलाबेन धीरुभाई अंबानी रुग्णालयात उपचार सुरू होते. उपचार सुरू असतानाच त्यांची बुधवारी रात्री प्राणज्योत मालवली. मृत्यू समयी ते 62 वर्षाचे होते. इस्माइल श्रॉफ यांनी प्रसिद्ध अभिनेता गोविंदाचं करियर घडवलं होतं. ते हे बॉलिवूडमधील अव्वल दर्जाचे दिग्दर्शक होते. त्यांच्या निधनाने बॉलिवूडवर शोककळा पसरली आहे.
इस्माइल श्रॉफ यांना अनेक आजारांनी ग्रासले होते. त्यामुळे त्यांच्यावर कोकिलाबेन धीरुभाई अंबानी रुग्णालयात उपचार सुरू होते. मात्र, काल रात्री त्यांची प्रकृती अचानक बिघडल्याने त्यांनी जगाचा निरोप घेतला.
इस्माइल श्रॉफ यांनी 80 आणि 90 च्या दशकाचा काळ गाजवला होता. त्यांनी अनेक सुपरडुपर हिट सिनेमांचं दिग्दर्शन केलं होतं. अहिस्ता अहिस्ता, बुलंदी, थोडी सी बेवफाई, सूर्या आदी सिनेमांचं त्यांनी दिग्दर्शन केलं होतं. इस्माइल श्रॉफ यांचं खरं नाव एस. व्ही. इस्माइल होतं. पण सिनेमात त्यांची ओळख इस्माइल श्रॉफ अशीच होती.
इस्माइल श्रॉफ यांच्या निधनावर बॉलिवूडमधून शोक व्यक्त होत आहे. अभिनेता गोविंदानेही श्रॉफ यांच्या निधनावर तीव्र दु:ख व्यक्त केलं आहे. गोविंदाने बॉलिवूडमध्ये लव्ह 86 या सिनेमातून पदार्पण केलं होतं. इस्माइल श्रॉफ यांनी या सिनेमाचं दिग्दर्शन केलं होतं.
श्रॉफ यांच्या निधनामुळे मी फार उदास आहे. माझ्या करियरची सुरुवात त्यांच्या सोबत झाली होती. परमेश्वर त्यांच्या आत्म्यास शांती देवो, अशा शब्दात गोविंदाने दु:ख व्यक्त केलं.
त्यांनी मला केवळ कामच दिलं नव्हतं तर माझ्यावर विश्वास टाकला होता. गोविंदाला सिनेमाची समज आहे, असं सांगणारे माझ्या आयुष्यातील ते पहिले व्यक्ती होते. मला गोविंदा म्हणून घडविण्यात त्यांचा सिंहाचा वाटा आहे, असंही गोविंदाने सांगितलं.
इस्माइल श्रॉफ यांनी गोविंदाशिवाय अनेक बड्या कलाकारांसोबत काम केलं. राजेश खन्ना, धर्मेंद्र, राजकुमार आदी अभिनेत्यांसोबत त्यांनी काम केलं. तर, शबाना आझमी आणि पद्मिनी कोल्हापुरे यांच्यासोबतही त्यांनी काम केलं
