सोलापूर: बेपत्ता असलेल्या मामा – भाच्याचा मृतदेह तलावात तरंगताना आढळल्याने खळबळ उडाली आहे. गणेश अनिल सपाटे (वय-२६, अलीपूर रोड बार्शी), शंकर उत्तम पटाडे (वय-४०, रा.
यशवंत नगर, तुळजापूर रोड, बार्शी) अशी मृत तरुणांची नावे आहेत. ही घटना (दि.१९) उघडकीस आली आहे.
गणेश सपाटे यांचे वडील अनिल दत्तात्रेय सपाटे यांनी दिलेल्या माहितीनुसार, त्यांचा मुलगा गणेश हा सोमवारी (दि. १७) संध्याकाळी ५ वाजता आपल्या मित्रांसोबत गावाला जात असल्याचे सांगून घराबाहेर पडला. मात्र, दोन दिवस उलटल्यानंतरही तो परत न आल्याने कुटुंबीयांनी त्याचा शोध घेण्यास सुरुवात केली.
गणेश सपाटेचा मोबाईल दोन दिवसांपासून बंद होता. बार्शी तालुक्यात शिवजयंती उत्सव मोठ्या उत्साहाने साजरा होत होता. १९ फेब्रुवारी रोजी बुधवारी दुपारी २ वाजण्याच्या सुमारास अनिल सपाटे यांनी मुलगा गणेश याच्या मोबाईल वर संपर्क साधण्याचा प्रयत्न केला होता. त्याचवेळी अनिल सपाटे यांना पांगरी पोलिसांचा फोन आला. महागाव जवळील तलावातील पुलाजवळ दोन अनोळखी पुरुषांचे मृतदेह आढळून आल्याचे त्यांनी सांगितले.
या घटनेची माहिती पोलिसांना मिळताच ते घटनास्थळी दाखल झाले. दोन्ही तरुणांचे मृतदेह तलावातून कोळी बांधवांच्या साहाय्याने बाहेर काढण्यात आले. हाताला आलेल्या पोराचा मृतदेह पाहून वडिलांना धक्का बसला. गणेश सपाटे आणि शंकर पटाडे हे दोघे मामा – भाचे असल्याची माहिती पोलिसांनी दिली. दोघांचा मृतदेह शवविच्छेदनासाठी पाठवण्यात आला आहे. हा घातपात आहे का? की अपघात? या बाजूने बार्शी तालुक्यातील पांगरी पोलीस ठाण्याचे पोलीस अधिकारी आणि कर्मचारी कसून तपास करत आहेत.
