टेंभूर्णी : भरधाव ट्रकने दुचाकीला पाठिमागून दिलेल्या धडकेत शाळकरी मुलाचा मृत्यू झाला. ही घटना सोमवारी (दि.१७) सायंकाळी पावणेसहाच्या सुमारास घडली. शेखर सारंग चौधरी (वय ११) असे या मुलाचे नाव आहे.
याप्रकरणी अखिलेशकुमार छनूलालकुमार (रा.गोपापुरा, ता.जसवंतनगर, उत्तरप्रदेश) या ट्रकचालकावर माढा पोलिस ठाण्यात गुन्हा दाखल करण्यात आला आहे.
याबाबत अधिक माहिती अशी, शेखर हा वडील सारंग चौधरी यांच्याबरोबर दुचाकीवरून करमाळा-टेंभुर्णी रोडवरून टेंभुर्णीकडे येत होते. ते टेंभुर्णी रोडवरील करमाळा ब्रीजजवळील पेट्रोल पंपाजवळ आले असता पाठीमागून आलेल्या ट्रकने त्यांच्या दुचाकीला जोराची धडक दिली. या अपघातात दुचाकीवर पाठिमागे बसलेला शेखर रस्त्यावर आदळला. यामध्ये डोक्याला गंभीर दुखापत झाल्याने त्याला रुग्णालयात दाखल करण्यात आले मात्र, उपचारापूर्वीच त्याचा मृत्यू झाला. अपघातात वडील सारंग चौधरी हे रस्त्याच्या बाजूला पडल्याने त्यांना किरकोळ दुखापत झाली. अपघातानंतर ट्रक चालकाने पळून जाण्याचा प्रयत्न केला मात्र माढा पोलिसांनी त्याला काही अंतरावर ताब्यात घेतले.
