कोट्यवधी चाहते त्याच्या सिनेमाची आतुरतेनं वाटत पाहत असतात. सुपरस्टार सलमान खान फॅन्ससाठी लाडका हिरो असला, तरी खरे हिरो आम्ही नव्हे. देशाच्या रक्षणासाठी सीमेवर तैनात असणारे सैनिक हेच असली हिरो आहेत, असं खुद्द सल्लूचं म्हणणं आहे. आगामी ‘ट्यूबलाइट’च्या निमित्तानं सलमाननं मारलेल्या या गप्पा…
० एखाद्या गोष्टीबाबत तुझी ‘ट्यूबलाइट’ उशिरा पेटली असं झालंय ?
खरं सांगायचं तर अजून पेटलीच नाहीय. दरवर्षी तुम्ही खूप काही करता, चुकता, धडपडता. मी तर बऱ्याचदा चुकतो आणि असा फसतो, पण त्यातूनच शिकतो आणि पुढे जातो. काही काळानंतर मागे पाहिलं की चेहऱ्यावर एक स्मितहास्य येतं आणि मी म्हणतो, ‘सुटलो रे बाबा’.
० ‘ट्यूबलाइट’ला १९६२च्या भारत-चीन युद्धाची पार्श्वभूमी आहे. युद्धामध्ये लढणाऱ्या आपल्या जवानांबद्दल तुझ्या काय भावना आहेत?
नाही, ‘ट्यूबलाइट’ हा सिनेमा युद्धावर बेतलेला नाही. पण त्यावेळच्या काही गोष्टी यात वापरल्या गेल्या आहेत. सिनेमात माझा भाऊ हा भारतीय सैन्यात दाखल होतो आणि मग पुढे गोष्ट सरकते. या निमित्तानं मला भारतीय सैनिकांच्या जवळ जाता आलं. त्यांची जीवनशैली जवळून पाहता आली. त्यांच्याबद्दल नुसतं वाटून काही उपयोग नाही. खरं तर त्यांच्यामुळेच आपण बिनधास्त राहतो. खरे हिरो तेच आहेत. पण त्यांना हव्या तितक्या चांगल्या सुविधा मिळत नाही. त्यांच्या शौर्याची हवी तशी दखलही घेतली जात नाही. अक्षय कुमारने जे त्यांच्यासाठी करायला घेतलंय ते खरंच कौतुकास्पद आहे. जवानांसाठी आपणच पुढे सरसावलं पाहिजे.
० चिनी अभिनेत्री जुजूसोबत काम करताना कसं वाटलं?
खरं सांगायचं तर फक्त भाषेचा फरक जाणवला. एकंदरीत तिला सिनेमा आवडतो आणि तीही खूप मेहनती आहे. तिच्या कामात, वागण्यात एक शिस्त दिसली.
० लहान मुलांविषयी तुला वाटणारं प्रेम सर्वांनाच माहिती आहे. हल्ली काही जण , सरोगसी किंवा दत्तक अशा माध्यमातून मुलाचा विचार करू लागलेत. तुझा असा काही विचार?
नाही, मी असं काहीही करणार नाही. खरं तर अशा जबाबदारीसाठी मी अजूनही तितकासा सक्षम नाही. लहान मुलांबद्दल नेहमीच प्रेम वाटतं. त्यांच्यासाठीच तर सिनेमे करतो. माझा खरा प्रेक्षक लहान मुलं हीच आहेत. ‘चिल्लर पार्टी’नंतर फक्त लहान मुलांना घेऊन सिनेमा करायचा विचार होता. पण तशी गोष्ट अद्याप सापडली नाही.
० बाहुबली विरोधात खान यावर काय सांगशील?
बाहुबली चार वर्षांत एक बनतो. पण खान आणि कुमार त्या चार वर्षांत सोळा सिनेमे करतात. बाहुबलीला मोठं करणारे आपले हिंदी सिनेमाचे प्रेक्षक आहेत. दाक्षिणात्य राज्यांत तामिळ, तेलुगू, मल्ल्याळम सिनेमेच पाहिले जातात. तसा आपला प्रेक्षकवर्ग नाही. त्यांना सिनेमा आवडतो, मग तो कोणत्याही भाषेतला असू दे. ते तिकीट काढून तो बघायला जातात.
मराठी माझी मातृभाषा
मराठी सिनेमाबद्दल वाटणाऱ्या प्रेमाविषयी तो म्हणाला, की ‘मराठी ही माझी मातृभाषा आहे. घरी मी आणि आई मराठीतून बोलतो. त्यामुळे मराठी चांगलं बोलता येतं. रितेश देशमुखच्या आगामी ‘छत्रपती शिवाजी’ या चित्रपटात मी एक भूमिका करताना दिसेन.
