नवी दिल्ली
‘ईव्हीएम’ मशीनमध्ये गडबड असल्याच्या सततच्या आरोपांमुळं निवडणूक आयोग संतापला असून असे बेछूट आरोप करून निवडणूक आयोगाची प्रतिमा मलिन करण्याचा प्रयत्न करणाऱ्यांवर कारवाई करण्याचा अधिकार द्या,’ अशी लेखी मागणी आयोगाने केंद्रीय कायदे मंत्रालयाला केली आहे. त्यासाठी न्यायालयाच्या बदनामी अधिनियम कायदा, १९७१मध्ये सुधारणेची मागणी आयोगानं केली आहे.
‘इंडियन एक्स्प्रेस’नं याबाबतचं वृत्त दिलं आहे. आयोगानं हे पत्र महिन्याभरापूर्वीच पाठवलं आहे. मात्र, कायदा मंत्रालयाकडून अद्याप त्यावर कोणतीही प्रतिक्रिया आलेली नाही. आयोगाच्या मागणीवर विचार सुरू असल्याचं कायदा मंत्रालयाकडून सांगण्यात आलं आहे.
विशेष म्हणजे, निवडणूक आयोगानं आपल्या पत्रात पाकिस्तानच्या निवडणूक आयोगासह इतर देशांच्या आयोगांचा दाखला दिला आहे. पाकिस्तानच्या निवडणूक आयोगाची विनाकारण प्रतिमा मलिन करणाऱ्यांविरोधात बदनामीचा खटला दाखल करण्याचा अधिकार तेथील निवडणूक आयोगाला असल्याचं सरकारच्या निदर्शनास आणून दिलं आहे. त्यानुसार तेथील आयोगानं आपल्या अधिकारांचा वापर करून इमरान खान यांना बदनामी केल्याप्रकरणी नोटीस देखील धाडली होती. इमरान खान यांनी निवडणूक आयोगावर परदेशातून होणाऱ्या फंडिंगबाबत पक्षपातपणा केला जात असल्याचा आरोप केला होता.
भारतात गेल्या काही महिन्यांपासून ‘ईव्हीएम’ मशीनमध्ये गडबड असल्याचा आरोप विरोधी पक्षांकडून केला जात आहे. ‘ईव्हीएम’ मशीन सदोष असून त्या हॅक करून भाजपने निवडणूक जिंकली असा आरोप करण्यात आला होता. आम आदमी पक्षानं आयोगाचं ‘ईव्हीएम’ मशीन हॅक करून दाखवण्याचं प्रात्यक्षिक दिल्लीच्या विधानसभेत दाखवल्याचा दावा केला होता. त्यानंतर आयोगाने थेट पत्रकार परिषद घेऊन सर्व राजकीय पक्षांना ‘ईव्हीएम’ मशीन हॅक करून दाखवण्याचं आव्हान दिलं होतं. आयोगाच्या आव्हान ‘आप’नं स्वीकारलंच नाही. केवळ राष्ट्रवादीने आयोगाचं आव्हान स्विकारलं, पण तेही आयोगाने दिलेला चार तासांचा कालावधी पुरेसा नसल्याचं राष्ट्रवादीने म्हटलं होतं. राजकीय पक्षाच्या या सोयीस्कर भूमिकांमुळं संतापलेल्या आयोगानं आता कारवाईच्या अधिकाराची मागणी केली आहे.
सर्वात जलद, सर्वात लोकप्रिय! पंढरपूर लाईव्ह वर आपल्या व्यवसायाची जाहिरात द्या.. अल्पदरात!! मुख्य संपादक-भगवान वानखेडे संपर्क- 8308838111
