प्रमोद सावंत बनले गोव्याचे नवे मुख्यमंत्री

मनोहर पर्रिकर यांच्या पार्थिवावर सायंकाळी अंत्यसंस्कार झाल्यानंतर राजकीय घडामोडींना कमालीचा वेग आला. भाजपाचे राष्ट्रीय अध्यक्ष अमित शाह, केंद्रीय मंत्री नितीन गडकरी आणि गोव्यातील भाजपाचे आमदारांची बैठक झाली. त्यावेळी प्रमोद सावंत यांच्या नावावर एकमत झाल्याचे समजते. शाह यांनी मात्र याबाबत गडकरी लवकरच याबाबत घोषणा करतील असे सांगून ते बैठकीतून बाहेर पडले. या बैठकीस प्रमोद सावंतही हजर होते. 

प्रमोद सावंत हे दोनवेळा साखळी मतदारसंघातून निवडून आले आहेत. काँग्रेसमधून जे नेते गेल्या वर्षभरात भाजपमध्ये आले, त्यांना मुख्यमंत्रीपद द्यायचे नाही असे भाजपने ठरवले होते. प्रमोद सावंत हे भाजप पक्ष संघटनेमधून पुढे आलेले आहेत. सावंत हे मार्च २०१७ पासून गोवा विधानसभेचे सभापती आहेत. ते यापूर्वी कधी मंत्री झाले नव्हते. तथापि, त्यांना आता थेट मुख्यमंत्री बनण्याची संधी मिळाली आहे. मगोप आणि गोवा फॉरवर्ड या दोन्ही घटक पक्षांनी उपमुख्यमंत्रीपद मागितले होते. ते देण्यास भाजप ब:याच चर्चेनंतर तयार झाले. 

गोवा फॉरवर्ड व मगोपने जास्त ताणून धरले व भाजपशी संघर्ष केला तर गोवा विधानसभा निलंबित केली जाण्याची शक्यता होती. विरोधी काँग्रेस हा सर्वात मोठा पक्ष असला तरी, त्या पक्षाला सरकार स्थापन करू देण्यास भाजप कधीच तयार होणार नाही याची कल्पना मगोप व गोवा फॉरवर्डलाही आहे.