कुलभूषण जाधवांसाठी बॅ. हरीश साळवेंची सातासमुद्रापार यशस्वी लढाई!

कुलभूषण जाधव यांना पाकिस्ताननं फाशीची शिक्षा सुनावल्यानंतर संपूर्ण देशातून याप्रकरणी संतप्त प्रतिक्रिया आल्या. त्यामुळे पाकिस्तानच्या या निकालानंतर भारतानं थेट आंतरराष्ट्रीय कोर्टाचे दरवाजे ठोठावले. कुलभूषण जाधव यांची बाजू मांडण्यासाठी भारताकडून बॅरिस्टर हरीश साळवे यांची निवड करण्यात आली.

हरीश साळवे यांनी आंतरराष्ट्रीय कोर्टात अतिशय समर्पक शब्दात पाकिस्तानचा खोटेपणा उघड केला. याचवेळी पाकनं व्हिएन्ना कराराचा भंग केल्याचंही त्यांनी आंतरराष्ट्रीय कोर्टाला पटवून दिलं. या संपू्र्ण युक्तीवादाचा आज परिणाम पाहायला मिळाला. हरीश साळवेंच्या याच युक्तीवादानंतर ‘अंतिम निकाल येईपर्यंत कुलभूषण जाधव यांना फाशी देता येणार नाही.’ असं आंतरराष्ट्रीय कोर्टानं पाकिस्तानला ठणकावून सांगितलं.

या संपूर्ण प्रकरणात हरीश साळवे यांनी बजावलेली भूमिका फार महत्वाची होती. त्यामुळे कुलभूषण जाधवांसाठी सातासमुद्रापार लढलेली लढाई एका मराठी माणसामुळे यशस्वी ठरली. असं म्हटल्यास वावगं ठरु नये.

हरीश साळवे हे प्रत्येक खटल्यासाठी लाखो रुपये घेतात असा त्यांचा लौकीक आहे. पण या खटल्यामध्ये हरीश साळवे यांनी फक्त 1 रुपये फी घेतली. खुद्द परराष्ट्रमंत्री सुषमा स्वराज यांनी याबाबत ट्वीटरवरुन माहिती दिली.

बॅरिस्टर हरीश साळवे यांची आजवरची कारकीर्द:
बॅरिस्टर हरीश साळवे… आंतरराष्ट्रीय न्यायालयात भारताची बाजू भक्कम करणारं हे नाव. देशातल्या सर्वात प्रभावशाली व्यक्तिमत्वांमध्ये 43वं नाव.

हरीश साळवे यांचा जन्म धुळे जिल्ह्यातल्या वरुड या गावात झाला. यांना वकिलीचं बाळकडू घरातूनच मिळालं. साळवे यांचे आजोबा पी. के. साळवे हे प्रख्यात क्रीमिनिल लॉयर होते. तर त्यांचे पणजोबा हे न्यायाधीश होते. साळवे यांचे वडील एन. के. पी. साळवे हे काँग्रेसचे दिग्गज नेते होते.

हरीश साळवे हे वकिली करण्याआधी सीए झाले. पण प्रख्यात वकील नानी पालखीवाला यांच्यामुळे प्रभावित झालेल्या साळवे यांनी सीए झाल्यानंतर वकिलीची डिग्री मिळवली.

* 1980 मध्ये जे. बी. दादाचंदजी आणि कंपनी यांच्याकडे साळवे यांनी इंटर्नशिप केली

* 1980 ते 1986 दरम्यान साळवे यांनी अॅटॉर्नी जनरल सोली सोराबजी यांच्यासोबतही काम केलं

* हरीश साळवे यांनी सर्वात आधी सर्वोच्च न्यायालयात अँटी डम्पिंग केस लढली.

* कृष्णा गोदावरी बेसिन गॅस वादाची केसही साळवे यांनीच अंबानींच्या बाजूने लढली होती.

* टाटा ग्रुपच्या अनेक खटल्यांची जबाबदारीही साळवे यांनी पेलली होती.

* भारत सरकारसोबतच्या कराच्या वादातही साळवे यांनी व्होडाफोनची बाजू मांडली

* इतकंच नाही, तर बिल्किस बानोची केसही साळवे यांनीच लढली होती.

* सलमान खानच्या हिट अँड रन प्रकरणातही साळवे यांनी सलमानची केस लढली.

साळवे यांच्या करियरचा आलेख कायम चढता असला, तरी त्यांच्याभोवती वादांची मालिकाही कायम होती.

– 2009 साली गुजरात दंगलीच्या निष्पक्ष न्यायादानासाठी हरीश साळवे हे योग्य वकील नसल्याचा दावा त्यांच्या विरोधकांनी केला.

– 2011 मध्ये तहलका मॅगझिननेही साळवे यांच्यावर गंभीर आरोप करत, मोदी सरकारशी साटंलोटं केल्याचा दावा केला.

– हरीश साऴवे हे अत्यंत महागडे वकील असून, फक्त उद्योजकांसाठी ते लॉबिंग करतात असा आरोपही त्यांच्यावर आहे.

कायद्याच्या धीरगंभीर वातावरणात असलेल्या हरीश साळवे यांची वेगळी बाजूही आहे. कारण साळवे हे संगीतप्रेमी असून, त्यांना चक्क पियानो वाजवण्याचा छंद आहे. इतकंच नाही, तर संगीत याच विषयात एके दिवशी आपण ऑक्सफर्ड विद्यापीठातही तज्ज्ञ म्हणून मार्गदर्शन करण्याचा विश्वास त्यांना आहे.

साळवे जितके निष्णात कायदेतज्ज्ञ आहेत. तितकेच त्यांचे शौक मोठे आहेत.

* साळवे यांच्या एका दिवसाची फी ही तब्बल 30 लाख रुपये असून, अंबानी बंधूंच्या एका खटल्यासाठी त्यांनी 15 कोटी आकारल्याचा दावा आहे.

* त्यांना आणि त्यांच्या सहकाऱ्यांना फाईव्ह स्टार्स हॉटेल्स आणि फर्स्ट क्लास एअर तिकीट्स बुक करावी लागतात अशीही ख्याती आहे.

* ब्रिटीश हँडमेड फोन व्हर्च्यु आणि महागड्या घड्याळ्यांचे साळवे शौकीन आहेत.

* साळवे हे केस फक्त एकदाच ऐकतात आणि त्यानंतर पुन्हा ते वादी किंवा प्रतिवादीला भेटत नाहीत.

* साळवे यांच्या ताफ्यात बेन्ट्लीसारखी गाडी आहे. तर त्यांचं गोव्यात हॉलिडे होम आहे.

* आपल्या कपडे खरेदीसाठी साळवे हे थेट लंडनला जातात.