‘देवेंद्रच्या हेलिकॉप्टरला झालेला हा दुसरा अपघात आहे. त्याला अनेकदा सांगितलं की, काळजी घे. नवीन हेलिकॉप्टर, विमान वापर. पण तो ऐकतच नाही. आता एवढ्या मोठ्या पोराला रागवायचं कसं?’…मुख्यमंत्र्यांच्या आई सरिता फडणवीस यांनी बोलताना या भावना व्यक्त केल्या.
मुख्यमंत्र्यांच्या आई आपली काळजी लपवू शकल्या नाही. त्या म्हणाल्या, ‘देवेंद्रचा प्रवास रोजचाच आहे. त्याच्याइतका प्रवास कुणीही करीत नसेल. अशा स्थितीत त्याच्या ऑफिसच्या अधिकाऱ्यांनी त्याची काळजी घ्यायला पाहिजे. यापुढे मीच लक्ष देणार आहे. कोण पायलट आहे, विमान, हेलिकॉप्टर नवं आहे की जुनं, चांगल्या स्थितीत आहे का, याची मी स्वतः चौकशी करणार आहे.’
…आणि काळजी मिटली!
मुख्यमंत्र्यांच्या हेलिकॉप्टरला अपघात झाल्यानंतर प्रसारमाध्यमांत बातमी येण्यापूर्वीच फडणवीस यांनी आईला फोन करून आपण सुखरूप असल्याचे सांगितले होते. ‘त्याचा फोन आला, तेव्हाच मला अपघात झाल्याचं कळलं. कोणालाही इजा झाली नाही, सगळेच सुखरूप आहेत हे त्याच्या
तोंडून ऐकल्यानंतर मी निश्चिंत झाले. सर्वांची वैद्यकीय तपासणी झाली. पण देवेंद्र तपासणी करायलाही तयार नव्हता. सर्वांच्या आग्रहास्तव तो शेवटी तयार झाला’, असे सरिता फडणवीस यांनी सांगितले.
