मध्य प्रदेशातील अशोकनगरमधून हृदयद्रावक घटना समोर आली आहे. हृदयविकाराच्या झटक्याने एका व्यक्तीचा मृत्यू झाला होता, ही बाब त्याच्या 11 वर्षाच्या मुलीला कळताच ती हा धक्का सहन करु शकली नाही, तिने विहिरीत उडी घेत स्वत:च आयुष्य संपवलं. या घटनेमुळे परिसरात हळहळ व्यक्त करण्यात येत आहे.
अशोकनगर जिल्ह्यातील बारखेडा जहागीर गावातील ही घटना घडल्याची माहिती समोर आली आहे. या गावात राहणाऱ्या ३६ वर्षीय रामबाबू धाकड हे शेतात काम करत होते. शुक्रवारी सकाळी ते शेतात गेले. मात्र तिथे काम करतना छातीत तीव्र वेदना होत असल्यामुळे ते शेतातून घरी परतले. कुटुंबीयांनी रामबाबूला खासगी रुग्णालयात नेले, तेथे डॉक्टरांनी त्याला मृत घोषित केले. ही बातमी घरी पोहोचताच शोककळा पसरली. रामबाबू यांची 11 वर्षांची मुलगी साधना हिला हा धक्का सहन झाला नाही. तिने घरातून पळ काढला आणि शेतातील विहिरीजवळ जाऊन उडी मारली.
मुलीने विहरीत मारली उडी
इकडे मुलीने घरुन निघून गेल्याची माहिती घरच्यांना मिळताच त्यांनीही शेताच्या दिशेने धाव घेतली मात्र तेथे कोणीही दिसले नाही. विहिरीबाहेर तिची चप्पल पाहून तिने आत पाहिले असता साधनाचा मृतदेह पडून होता. ग्रामस्थांनी ग्रामीण पोलीस ठाण्यात माहिती दिली. सुमारे दोन तासांनंतर मुलीचा मृतदेह विहिरीतून बाहेर काढण्यात आला.
रामबाबू यांना तीन मुली आणि एक मुलगा आहे. मुलगा सर्वात लहान आहे. 11 वर्षीय साधना तिसरीत होती आणि इयत्ता सातवीत शिकत होती. कुटुंबातील बाप-लेकीचा एकाचवेळी मृत्यू झाल्याने कुटुंबावर हलाखीची परिस्थिती निर्माण झाली आहे. दुपारी बाप-लेकी एकत्र अंत्यसंस्कार करण्यात आले.
