पंढरपूरकरांनी वाहिली वीर शहीदांना भावपुर्ण श्रध्दांजली

समस्त पंढरपूरकरांच्या वतीने हनुमानपेठ (वजिराबाद चौक) येथे अवंतीपूरच्या दहशतवादी हल्ल्यातील वीर जवानांना भावपूर्ण श्रध्दांजली अर्पण करण्यात आली. आज मंगळवार दि. 19 फेब्रुवारी रोजी संध्याकाळी 7 वाजता शिवयोगी मंगल भवन, लिंक रोड, पंढरपूर येथे मेणबत्त्या प्रज्वलीत करुन जवानांना श्रध्दांजली अर्पण करण्यात आली. पुलवामाकडे निघालेल्या सीआरपीएफच्या जवानांच्या गाडीवर दहशतवाद्यांनी हल्ला केला, या हल्ल्यात 49 जवान शहीद झाले. शहीदांच्या वीर मरणामुळे सबंध देश शोकसागरात बुडालेला आहे. पाकिस्तान व दहशतद्यांच्या विरोधात सर्वत्र तीव्र संताप व्यक्त होत आहे.

 19 फेब्रुवारी रोजी शिवयोगी मंगल भवनमध्ये पंढरीतील राजकीय, सामाजिक, शैक्षणिक क्षेत्रातील अनेक मान्यवर मंडळींसह पंढरीतील व्यापारी, नगरसेवक, विद्यार्थी, गृहिणी यांनी शहीद जवानांना भावपुर्ण श्रध्दांजली अर्पण केली. यावेळी वीर जवान तुझे सलाम, वीर जवान अमर रहे, वंदे मातरम् अशा घोषणा देऊन भारतीय जवानांप्रती कृतज्ञता व्यक्त केली. शहीद वीरांच्या कुटूंबियांवर जो दु:खाचा डोंगर कोसळलेला आहे या दु:खामध्ये आम्ही तमाम पंढरपूरकर सहभागी आहोत. त्यांच्या पाठीशी खंबीरपणे संपुर्ण देशासह आम्ही उभे आहोत. अशा भावना अनेकांनी व्यक्त केल्या.