पंढरपूर (प्रतिनिधी):- अहमदनगर जिल्ह्यातील कर्जत तालुक्यामधील कोपर्डी येथील अल्पवयीन मुलीवर बलात्कार करुन तिची निघृण हत्या केल्याच्या घटनेचा अ.भा.छावा मराठा युवा संघटन पंढरपूरच्या वतीने आज दि.17 जुलै रात्री साडे सात वाजता येथील छत्रपती शिवाजी चौक येथे कँडल मार्च काढून निषेध व्यक्त करण्यात आला.
कोपर्डी येथील घटना ही अत्यंत अमानुष व जनावरांनाही लाज वाटावी अशी माणुसकीला काळीमा फासणारी व महाराष्ट्राच्या इतिहासात अत्यंत निंदणीय ठरेल अशी घटना आहे. या घटनेत सामील असलेल्या तीघा नराधम आरोपींना आत्तापर्यंत पोलिसांनी अटक केलेली आहे; परंतु यामध्ये अनेक नराधम क्रुर आरोपींचा सहभाग आहे. यातील मोकाट असलेल्या बाकीच्या आरोपींच्या मुसक्या तात्काळ आवळून त्यांना जेरबंद करावे, निर्भया अत्याचार व हत्याकांड प्रकरणानंतर कायद्यामध्ये जो बदल करुन कडक कायदा अस्तित्वात आला. त्यानुसार याप्रकरणीही जलदगतीने कारवाई व्हावी व या घटनेतील आरोपींना कठोरात कठोर शिक्षा व्हावी. अशा मागण्या यावेळी करण्यात आल्या.
फिर्यादीच्या म्हणण्याप्रमाणे या गुन्ह्यात सामील असलेल्या सर्व आरोपींना अटक करावी. सदर प्रकरणातील पीडीत कुटुंबाला 25 लाखाची तातडीची मदत करण्यात यावी. आरोपींच्या कुटूंबियांकडून कोपर्डी गावात सतत दहशत पसरवली जाते व त्याद्वारे जाती व सामाजिक सलोखा बिघडविण्याचे प्रयत्न झालेले आहेत. तरी आरोपींच्या कुटूंबियांचा पुर्व इतिहास तपासून त्यांच्यावर कठोरात कठोर कायदेशीर कारवाई करावी. आदी मागण्याही यावेळी संघटनेच्या वतीने करण्यात आल्या.
यावेळी अखिल भारतीय छावा मराठा युवा संघटन, पंढरपूर शहर व तालुक्यातील सर्व कार्यकर्ते व पदाधिकारी मोठ्या संख्येने उपस्थित होते.
