पंढरपूर-चैताली फाळके मृत्यु प्रकरण… दीर विश्‍वजीत फाळकेचा जामीन अर्ज फेटाळला..!

पंढरपूर (प्रतिनिधी):- यात हकीकत अशी की, दि. 13/07/2017 रोजी पंढरपूरमधील चैताली अभिजीत फाळके हिचा तिरंगा नगर येथील राहत्या घरी संशयास्पद मृत्यु झाला होता. याप्रकरणी मयताचे वडील यांनी पंढरपूर शहर पोलिस स्टेशन येथे पती अभिजीत वसंत फाळके व सासु शोभा वसंत फाळके यांच्या विरुध्द फिर्याद दिली होती. तद्नंतर दि.28/07/2017 रोजी त्यांनी पुरवणी जबाबामध्ये सासरा वसंत नरहरी फाळके, दीर विश्‍वजीत वसंत फाळके व नणंद ऐश्‍वर्या उर्फ स्नेहल वसंत फाळके हे ही माहेरहून पैसे आणण्यासाठी चैतालीचा छळ करत होते. व सारखा मानसीक व शारिरीक छळ करीत होते. अशा स्वरुपाचा पुरवणी जबाब त्यांनी दिला होता. याप्रकरणी सदर आरोपींवरती  हुंडाबळी या कलमाची नव्याने वाढ झाली होती. तद्नंतर आरोपी विश्‍वजीत फाळके याला अटक करण्यात आली होती.


याप्रकरणी यातील आरोपी विश्‍वजीत वसंत फाळके यानेे पंढरपूर येथील सत्र न्यायालयामध्ये जामीनासाठी वकीलांमार्फत अर्ज दाखल केला होता. सरकारी वकील अ‍ॅड.सारंग वांगीकर यांनी हा गुन्हा गंभीर स्वरुपाचा आहे. यातील आरोपी दीर विश्‍वजीत हा गुन्हा घडला तेंव्हा घटनास्थळी हजर होता.’’ व इ. युक्तीवाद केला. तर मुळ फिर्यादीचे वकील अ‍ॅड. शशी कुलकर्णी व अ‍ॅड. ओंकार बुरकुल यांनी न्यायालयाच्या निदर्शनास आणून दिले की, चैतालीची आत्महत्या नसून शांत डोक्याने तिची पुर्वनियोजित हत्या झालेली आहे. राजकीय दबावापोटी ही हत्या अतिशय हुशारीने ‘आत्महत्या आहे’ असा बनाव केलेला आहे.’’ यावेळी मुळ फिर्यार्दीचे वकिलांनी कांही महत्वाची कागदपत्रे सादर करुन आरोपीच्या जामीनास तीव्र विरोध केला. व वेळोवेळी मयताच्या वडीलांनी अभिजीत फाळके यांच्या खात्यावर पैसे भरल्याच्या पावत्या मे. कोर्टाच्या रेकॉर्डवर आलेल्या आहेत. या प्रकरणी मे.कोर्टाने या सर्व बाबींचा विचार करुन व सरकारी वकील अ‍ॅड. सारंग वांगीकर व मुळ फिर्यादीचे वकील अ‍ॅड. शशी कुलकर्णी व अ‍ॅड. ओंकार बुरकुल अ‍ॅड. स्वप्नील सरवदे यांचा युक्क्तीवाद ग्राह्य धरुन पंढरपूर येथील जिल्हा व सत्र न्यायाधीश ए. जे. पाटांगणकर यांनी आरोपींचा जामीन अर्ज फेटाळला.


या प्रकरणी सासु शोभा वसंत फाळके, सासरा वसंत नरहरी फाळके, नणंद ऐश्‍वर्या उर्फ स्नेहल वसंत फाळके हे तिघेही अद्याप फरार आहेत. मयताच्या कुटूंबियांनी खुनाचा गुन्हा दाखल करण्याची मागणी सोलापूर ग्रामीण चे पोलिस अधिक्षक विरेश प्रभु व पंढरपूर उपविभागीय पोलिस अधिकारी निखील पिंगळे यांचेकडे केली आहे. या प्रकरणाच्या बर्‍याचशा बाबी संशयास्पद आहेत. 


 याप्रकरणी अद्याप फरार असणारे आरोपी वसंत नरहरी फाळके व स्नेहल उर्फ ऐश्‍वर्या फाळके यांनी अटकपुर्व जामीनासाठी पंढरपूर जिल्हा सत्र न्यायालयात अर्ज दाखल केले आहेत. याप्रकरणी सुनावणी दि. 27 सप्टेंबर 2017 रोजी होणार आहे. या प्रकरणी सरकारतर्फे अ‍ॅड.सारंग वांगीकर, मुळ फिर्यादीतर्फे अ‍ॅड. शशी कुलकर्णी, अ‍ॅड. ओंकार बुरकुल तर आरोपीतर्फे अ‍ॅड. प्रशांत उंडाळे हे काम पाहत आहेत.


 या प्रकरणाचा तपास सोलापूर स्थानिक गुन्हे शाखेकडे वर्ग करण्यात आला आहे.