तुकाराम भवनमध्ये महाप्रसादासाठी आलेल्या भाविकांची पादत्राणे जाताहेत चोरीला… मंदिर समितीने योग्य त्या उपाययोजना कराव्यात… भाविकांमधून मागणी!

पंढरपूर मध्ये तुकाराम भवन येथे भाविकांसाठी दररोज महाप्रसादाची सुविधा मंदिर समितीनं उपलब्ध केलेली आहे. परंतु येथे महाप्रसादासाठी आलेल्या भाविकांची पादत्राणे चोरीस जात असल्याच्या तक्रारी वाढत आहेत. यामुळे तुकाराम भवन येथे महाप्रसादासाठी आलेल्या भाविकांचं अर्ध ध्यान बाहेर सोडलेलं आपलं पादत्राण सुरक्षित आहे की नाही याकडं लागलेलं असतं. मंदिर समितीकडून यावर वेळीच योग्य त्या उपाययोजना करण्याची मागणी भाविकांमधून होत आहे.

  महाप्रसाद घेण्यासाठी अनेक भाविक तुकाराम भवन च्या बाहेर आपली पादत्राणे सोडतात.  महाप्रसाद घेऊन तृप्त झालेला भाविक जेंव्हा बाहेर येतो तेंव्हा आपली चप्पल अथवा बुट गायब झाल्याचे पाहून अवाक् होतो. देवाच्या दारात देवाचा प्रसाद भेटला याचं समाधान मनाच्या एका कोपर्‍यात साठवलेला भाविक “जाऊ दे गेली तर”.म्हणत नाराज मनानं नवीन पादत्राणे खरेदी करायला जातो. 

गेल्या काही वर्षांपासून चप्पलचोरांचा हा कारभार बिनबोभाट चाललेला असून यावर कोणीही काही बोलत नसल्याने हल्ली तुकाराम भवन, महाद्वार आदी मंदिर परिसरात पादत्राणे चोरीच्या घटनांमध्ये वाढ झालेली आढळून येत आहे.
महाप्रसादासाठी गेल्यावर चप्पल चोरीला जाईल या भीतीमुळे अनेक भक्त महाप्रसादाचा लाभ घेणं टाळतात.

मंदिर समिती प्रशासनाकडून निदान तुकाराम भवनमध्ये महाप्रसाद घेण्यासाठी आलेल्या भाविकांची पादत्राणे सुरक्षीत ठेवण्यासाठी चप्पल स्टॅन्ड ची सोय करावी. येथे सीसीटीव्ही व सुरक्षा रक्षकाची सोय करावी. अशी मागणी भाविकांमधून होत आहे.