सेंट पीटर्सबर्ग
दहशतवाद हा जगासाठी सर्वांत मोठा धोका असून, दहशतवाद्यांना निधीचा पुरवठा; तसेच शस्त्रास्त्रे आणि संवादाची साधने पुरवणे बंद करावीत, असे आवाहन पंतप्रधान नरेंद्र मोदी यांनी जागतिक समुदायाला पाकिस्तानचे नाव न घेता केले. ‘सेंट पिट्सबर्ग आंतरराष्ट्रीय आर्थिक व्यासपीठ’ परिषदेअंतर्गत मोदी यांनी उपस्थितांना संबोधित केले. या वेळी रशियाचे अध्यक्ष व्लादिमिर पुतिन यांच्यासह ऑस्ट्रिया व मोलदोव्हाचे नेते उपस्थित होते.
‘आपण केवळ काही घटनांचा विचार न करता, दहशतवादाकडे पाहावे. दहशतवाद हा मानवजातीचा शत्रू आहे. दहशतवादाविरुद्ध लढण्यासाठी आपण सर्वांनी एकत्र यायला हवे,’ असे आवाहन मोदी यांनी केले. दहशतवादाची व्याख्या करणे आणि दहशतवाद्यांना मदत करणाऱ्यांची व्याख्या करणे या दोन्ही मुद्द्यांवरील प्रस्ताव संयुक्त राष्ट्रांकडे गेली ४० वर्षे पडून आहे, याकडे मोदी यांनी लक्ष वेधले. संयुक्त राष्ट्रांचे सरचिटणीस अँटटोनिओ ग्युट्रेस या वेळी उपस्थित होते. या मुद्द्यावर कोणतीही चर्चा झाली नाही, की कोणता निर्णय, असे मोदी म्हणाले. पुतिन यांनी गुरुवारी या विषयावर चर्चेची मागणी केली होती. दहशतवादी शस्त्रास्त्रांचे उत्पादन करीत नाहीत, काही देश त्यांना बंदुका पुरवतात. त्याच पद्धतीने दहशतवादी नोटा छापत नाहीत, काही देश त्यांना हवालामार्फत अर्थपुरवठा करतात, अशी टीका पाकिस्तानचे थेट नाव न घेता, त्यांनी केली. दहशतवाद्यांकडे स्वतःची दूरसंचार माध्यमे किंवा सोशल मीडिया नसतात, काही देश त्यांना त्यासाठी मदत करतात, याकडे मोदी यांनी लक्ष वेधले.
‘आता आपण चांगला दहशतवाद, वाईट दहशतवाद अशा वादाच्या किंवा आमचे दहशतवादी, तुमचे दहशतवादी अशा वक्तव्यांच्या बाहेर येऊन दहशतवादाकडे पाहावे. हा संपूर्ण मानवजातीचा प्रश्न आहे. या पद्धतीने आपण दहशतवादाशी लढू शकतो,’ असे ते म्हणाले. भारत गेली ४० वर्षे सीमेवरील दहशतवादाचा बळी ठरला आहे; परंतु जागतिक पटलावर याकडे केवळ कायदा व सुव्यवस्थेचा प्रश्न म्हणून पाहिले गेले,’ अशी खंत त्यांनी व्यक्त केली. दहशतवादाला सीमा नाही. आपण सर्वांनी एकत्रित त्याविरोधात लढा द्यायला हवा. पुतिन यांनीही भारत गंभीर प्रश्नाशी सामना करीत आहे, असे म्हटले आहे, याची आठवण त्यांनी करून दिली.
