नोटाबंदीच्या निर्णयानंतर बहुतांशी सगळ्यांच्याच स्मार्टफोनमध्ये अढळ स्थान मिळवलेल्या ‘पेटीएम’ अॅपचे संस्थापक आणि सीईओ विजय शेखर शर्मा यांनी दिल्लीतील व्हीव्हीआयपी ल्युटियन्स झोनमध्ये तब्बल ८२ कोटी रुपयांचा बंगला खरेदी केला आहे. त्यामुळे मोदी सरकारची नोटाबंदी पेटीएमला चांगलीच फळल्याची चर्चा रिअल इस्टेट आणि आयटी वर्तुळात आहे.
फोर्ब्सच्या यादीत विजय शेखर शर्मा हे भारतातील सर्वात तरुण अब्जाधीश ठरले होते. त्यांच्याकडे १.३ अब्ज डॉलर्स इतकी संपत्ती आहे. विशेष म्हणजे गेल्या वर्षीच्या तुलनेत यंदा त्यांची संपत्ती १६२ टक्क्यांनी वाढली आहे. ‘लेस कॅश इकॉनॉमी’च्या केंद्र सरकारच्या प्रयत्नात या कंपनीनी बक्कळ ‘कॅश’ कमावली. या घसघशीत उत्पन्नातूनच विजय शेखर शर्मा यांनी ६० हजार चौरस फुटांचा बंगला विकत घेतला आहे. ८२ कोटींच्या या व्यवहारातील अनामत रक्कम शर्मा यांनी देऊ केली असून अद्याप त्यांची अधिकृत नोंदणी झालेली नाही.
फ्लिपकार्टच्या खालोखाल पेटीएम ही देशातील दुसऱ्या क्रमांकाची डिजिटल स्टार्ट-अप कंपनी आहे. विजय शेखर शर्मा यांच्या कंपनी वन97 ने ऑगस्ट २०१० मध्ये पेटीएमचा नारळ फोडला होता. शर्मा यांच्याकडे पेटीएमचे १६ टक्के समभाग असून जपानच्या सॉफ्ट बँकेनं अलीकडेच या कंपनीत १.४ अब्ज डॉलर्सची गुंतवणूक केली होती. त्यानंतर कंपनीचं बाजारमूल्य ७ अब्ज डॉलर्स इतकं झालंय. पेटीएम पेमेंट बँकेतही शर्मा यांची ५१ टक्क्यांची भागीदारी आहे. ५०० आणि हजाराच्या नोटा चलनातून रद्द करण्याच्या पंतप्रधान नरेंद्र मोदी यांच्या घोषणेनंतर पेटीएमचं भाग्य खऱ्या अर्थानं फळफळलं. ‘शर्माजी का बंगला’ हे त्याचंच प्रतीक आहे.
सर्वात जलद, सर्वात लोकप्रिय! पंढरपूर लाईव्ह वर आपल्या व्यवसायाची जाहिरात द्या.. अल्पदरात!! मुख्य संपादक-भगवान वानखेडे संपर्क- 8308838111
