मुंबई
राष्ट्रपतीपदासाठी आपण अजिबात इच्छुक नसल्याचं राष्ट्रीय स्वयंसेवक संघाचे सरसंघचालक मोहन भागवत यांनी आधीच स्पष्ट केलेलं असताना, शिवसेनेनं पुन्हा एकदा या मानाच्या पदासाठी त्यांच्याच नावाची जोरदार शिफारस केली आहे.
देशाच्या राष्ट्रपती भवनात ‘जनतेचा’ माणूस व हिंदुत्ववादी विचारांचा माणूस हवा असेल तर सरसंघचालकांना राष्ट्रपती करून हिंदू राष्ट्र संकल्पनेवर शिक्कामोर्तब करायला हवे, अशी ठाम भूमिका शिवसेना पक्षप्रमुख उद्धव ठाकरे यांनी ‘सामना’च्या अग्रलेखातून मांडली आहे.
आजपर्यंत सेक्युलर सरकारांचे ‘रबर स्टॅम्प’ राष्ट्रपती भवनात बसले. मग आता राममंदिर, समान नागरी कायदा, ३७० कलम हे रेंगाळलेले देशहिताचे प्रश्न सोडविण्यासाठी हिंदुत्वाचा ‘रबर स्टॅम्प’ राष्ट्रपती भवनात विराजमान झाला तर बिघडले कुठे?, असा थेट सवाल करत, सरसंघचालकांचे मन वळवायलाच हवे, अशी तीव्र इच्छा उद्धव यांनी बोलून दाखवली आहे.
>> देशाच्या राष्ट्रपती पदाची निवडणूक जाहीर झाली आहे. २० जुलै रोजी राष्ट्रपती नामक नव्या ‘रबर स्टॅम्प’ची घोषणा केली जाईल.
>> अमेरिकेसारख्या देशाचे राष्ट्रपती थेट जनतेतून निवडून दिले जातात. त्यामुळे ते राष्ट्राचे खऱ्या अर्थाने कारभारी असतात. भारतात देशाचे घटनात्मक प्रमुख म्हणून ते विराजमान असले तरी बऱ्याच अर्थाने ते शोभेचेच पद झाले आहे.
>> बऱ्याचदा राजकारणात निवृत्त झालेल्यांची सोय राज्यपालपदी लावून त्यांना राजभवनात पाठवले जाते. त्यामुळेच त्या पदाचे महत्त्व कमी झाले आहे.
>> राष्ट्रपती भवनात डॉ. अब्दुल कलाम किंवा प्रणव मुखर्जींसारखी व्यक्ती बसली की त्यातल्या त्यात त्या पदाची शान राहते, अन्यथा तो एक थाटामाटाचा जंगी लग्नसोहळाच ठरतो.
>> पंतप्रधान मोदींच्या हाताने ज्यास मुंडावळ्या बांधल्या जातील तोच नवरदेव ठरणार आहे. ते परदेश दौऱ्यावर असले तरी त्यांनी नाव नक्कीच ठरवले असेल.
>> राष्ट्रपतीपद शोभेचे असले तरी प्रतिष्ठेचे आहे. सह्याजीराव आणि रबर स्टॅम्प अशी टीका झाली तरी ते भारतीय घटनेच्या कुंकवाचे धनी आहेत.
>> लालकृष्ण आडवाणी, मुरली मनोहर जोशी यांचे पक्षातील स्थान डळमळीत झाले आहे. सुषमा स्वराज यांच्याबरोबरीने ओरिसाच्या राज्यपाल महिलेचे नावही चर्चेत आहे.
>> आम्ही आजही सरसंघचालक मोहन भागवत यांच्या नावावर ठाम आहोत. सरसंघचालकांचे मार्गदर्शन एरव्ही देशाला होतच असते, पण घटनात्मक प्रमुख म्हणून राष्ट्रपती पदावरील त्यांचे मार्गदर्शन महत्त्वाचे ठरेल.
>> सरसंघचालक राष्ट्रपती पदावर विराजमान होणे हा आतापर्यंत ज्या विचारांसाठी रा. स्व. संघासह आपण सर्वांनी संघर्ष केला त्या विचारांचा विजय ठरेल. हिंदू राष्ट्रावर ‘मोहोर’ उठवणारा राष्ट्रपतीच आता देशाला हवा आहे.
