चीन, रशिया, इटली, कोरिया, कुवेत, सिंगापूरही उत्सुक
प्रस्तावित नागपूर-मुंबई सुपर कम्युनिकेशन एक्स्प्रेसवेच्या बांधकामासाठी महाराष्ट्र राज्य रस्ते विकास प्राधिकरणाकडे ३३ कंपन्यांकडून पूर्वपात्रता अर्ज प्राप्त झाले आहेत. या ३३ कंपन्यांपैकी १७ एकल असून उर्वरित संयुक्त उपक्रम कंपन्या आहेत. एमएसआरडीसीने जानेवारी २०१७ मध्ये हे अर्ज मागवले होते. भारतीय कंपन्यांमध्ये हिंदुस्तान कन्स्ट्रक्शन कंपनी, लार्सन अॅण्ड टूब्रो, रिलायन्स इन्फ्रास्ट्रक्चर, गॅमन इंडिया, अशोका बिल्डकॉन, गायत्री प्रोजेक्टस, सिम्प्लेक्स इन्फ्रास्ट्रक्चर यासह २१ कंपन्यांनी अर्ज केले आहेत.
सुमारे ७०० किमीचा हा महामार्ग राज्यातील १० जिल्हे, २६ तालुके आणि ३९२ गावांना जोडणार आहे. त्यासाठी ४६ हजार कोटी रुपये खर्च अपेक्षित आहे. प्रकल्पासाठी चीनमधून ४ कंपन्या, रशियामधून २, टर्कीतून २ आणि इटली, कुवेत, कोरिया आणि सिंगापूरमधून प्रत्येकी एक पूर्व पात्रता अर्ज प्राप्त झाले आहेत. एमएसआरडीसीचे उपाध्यक्ष आणि व्यवस्थापकीय संचालक राधेश्याम मोपलवार यांनी जागतिक दर्जाच्या कंपन्यांनी या प्रकल्पासाठी पूर्वपात्रता अर्ज करणे म्हणजे प्रकल्पाबद्दचा त्यांचा विश्वास अधिक दृढ झाल्यासारखा आहे, असे सांगितले.
महामार्गाचे बांधकाम यंदाच्या एक ऑक्टोबरपासून सुरू करून ऑक्टोबर २०१९पर्यंत पूर्ण करण्याचे एमएसआरडीसीने ठरवले आहे.
या प्रकल्पामुळे रोजगारांची निर्मिती होईल, शेती आणि त्यावर आधारित उपक्रमांचा विकास साधला जाईल आणि जोरकस पायाभूत सुविधांच्या उभारणीचा पाया घातला जाईल आणि पर्यायाने ग्रामीण भागांतून शहरांकडे स्थलांतर थांबेल.
किरण कुरुंदकर, सहव्यवस्थापकीय संचालक, एमएसआरडीसी
