मुंबई
कोकणसह राज्यातील अनेक भागात मान्सूनचं आगमन झालेलं असतानाच मुंबईतील अनेक भागात आज जोरदार पावसाला सुरुवात झाली आहे. मुंबई, उपनगरात आज सकाळपासूनच पावसाने हजेरी लावल्याने पावसात भिजून मुंबईकर ‘संडे’ साजरा करण्याच्या मूडमध्ये दिसत आहेत.
येत्या २४ तासांत कोकणासह मुंबईत मुसळधार पाऊस पडेल असा अंदाज हवामान खात्याने काल शनिवारी वर्तविला होता. हवामान खात्याचा हा अंदाच खरा ठरला असून रविवारी सकाळपासूनच मुंबईतील अनेक भागात पाऊस पडायला सुरूवात झाली आहे. काल ठाण्यात जोरदार पाऊस बरसला होता. तर दोन दिवस उशिराने मान्सून कोकणासह गोव्यात दाखल झाला आहे. मुंबई, ठाणे कोकण परिसरात पाऊस बरसल्याने उन्हापासून नागरिकांना दिलासा मिळाला आहे.
सध्याची पूरक स्थिती पाहत कोकणात अतिवृष्टी होण्याची शक्यता आहे. याशिवाय कर्नाटकाचा अंतर्गत भाग, रायलसीमाचा आणखी काही भाग, आंध्र प्रदेश किनारपट्टी, मध्य आणि उत्तर बंगालचा उपसागर आणि त्रिपुरा, आसाम, मेघालयाचा उर्वरित भागातही पावसाने हजेरी लावली आहे.
