पिंपरी
पती सारखा व्हॉट्सअॅपवर बोलतो, असे घरातील फळ्यावर लिहून औंध लष्कर परिसरात एका जवानाच्या पत्नीने गळफास लावून आत्महत्या केली. संबंधित विवाहितेने १९ जूनला औंध येथील मिलिटरी क्वार्टर्समध्ये राहत्या घरी गळफास घेतला होता. उपचारांदरम्यान गुरुवारी त्यांचा मृत्यू झाला.
स्वाती अमोल जगदाळे (वय २७, रा. औंध मिलिटरी क्वार्टर्स) असे आत्महत्या केलेल्या विवाहितेचे नाव आहे. पोलिस उपायुक्त गणेश शिंदे यांनी दिलेल्या माहितीनुसार, स्वाती जगदाळे यांनी सोमवारी गळफास घेतला होता. तेव्हा त्यांना तत्काळ हॉस्पिटलमध्ये दाखल करण्यात आले होते. तेथे उपचारांदरम्यान त्यांचा मृत्यू झाला आहे. आत्महत्येपूर्वी स्वाती यांनी घरातील फळ्यावर (व्हाइट बोर्ड) ‘पती दारू पितो, तसेच तो सारखा व्हॉट्सअॅपवर बोलत असतो,’ अशा आशयाचा मजकूर लिहिला होता.
मात्र, याप्रकरणी अद्याप कोणीही तक्रार दिलेली नाही. त्यामुळे सांगवी पोलिस ठाण्यात अकस्मात मृत्यूची नोंद करण्यात आली आहे. संबंधित दाम्पत्य हे मूळचे पुरंदर तालुक्यातील आहे. नोकरीनिमित्त ते सध्या औंध येथे राहत आहे. स्वाती यांच्या कुटुंबीयांकडून याबाबत तक्रार दाखल झाल्यानंतर आरोपींवर गुन्हा दाखल करण्यात येणार आहे. तीनच दिवसांपूर्वी सांगवी परिसरात एका जवानाच्या पत्नीने गळफास घेऊन आत्महत्या केली होती.
सर्वात जलद, सर्वात लोकप्रिय!
