सांगली- मिरज रस्त्यावर गुरुवारी पहाटे भीषण अपघात झाला. नियंत्रण सुटलेली कार झाडावर आदळल्याने तीन तरुणांचा दुर्दैवी अंत झाला. निनाद आरवाडे, विकी चव्हाण, संमेद निल्ले अशी या तरुणांची नावे आहे. या अपघातात आणखी दोन जण जखमी झाले असून त्यांच्यावर सिव्हिल रुग्णालयात उपचार सुरु आहेत.

सांगलीतील पाच तरुण गुरुवारी रात्री पार्टीसाठी मिरजला गेले होते. मिरजवरुन परतत असताना पहाटे तीनच्या सुमारास सांगली- मिरज रस्त्यावर चालकाचे कारवरील नियंत्रण सुटले आणि कार झाडावर जाऊन आदळली. यात तिघांचा मृत्यू झाला. तर कारचालक आणि त्याच्या मागे बसलेला तरुण जखमी झाला. मृतांपैकी निनाद हा कंत्राटदार होता. तर उर्वरित तरुणही इंजिनिअरिंग क्षेत्रात कार्यरत होते. याप्रकरणी पोलीस अधिक तपास करत आहेत.