‘नवनीत’ च्या मालकांचे अपहरण करून खून, 5 कोटी रुपयांच्या खंडणीसाठी झाले होते अपहरण

‘नवनीत’ च्या मालकांचे अपहरण करून खून, 5 कोटी रुपयांच्या खंडणीसाठी झाले होते अपहरण

अहमदाबाद – प्रसिद्ध नवनीत प्रकाशन या बड्या प्रकाशन संस्थेचे मालक नवीन शहा (७१) यांचा खून करण्यात आल्याची घटना घडली. मंगळवारपासून ते बेपत्ता झालेले होते. शुक्रवारी त्यांचा मृतदेह गुजरातेतील मालपूर येथे आढळला.

या प्रकाशन संस्थेतील माजी कर्मचारी जिग्नेश भावसार हा मुख्य आरोपी असून त्याच्यासह चार आरोपींना पोलिसांनी पकडले आहे. नवीनभाई यांना एकच किडनी होती. एक किडनी त्यांनी पत्नीला दान केली होती. आरोपींनी ५ कोटी रुपयांच्या खंडणीसाठी त्यांचे अपहरण केले होते.

पोलिसांनी दिलेल्या माहितीनुसार, नवीन शहा अहमदाबादेत राहत होते. २५ जुलै रोजी घरातून प्रिंटिंग प्रेसला जाण्यासाठी बाहेर पडले होते. ड्रायव्हर कार चालवत होता. वाटेत त्यांनी कार थांबवली आणि एका रेस्टाॅरंटमध्ये गेले. तेथून ते बाहेर पडलेच नाहीत. नंतर तेथून हरवल्याची तक्रार त्यांच्या चालकाने पोलिस ठाण्यात दिली. गुरुवारी रात्री अरवल्ली जिल्ह्यातील गाजणगावात एक मृतदेह सापडल्याची माहिती सरपंचाने पोलिसांना दिली. मृतदेह छिन्नविच्छिन्न अवस्थेत सापडला होता. पोलिसांनी मृतदेह ताब्यात घेतला. त्यांच्या नातेवाइकांनी मृतदेह नवीन शहा यांचाच असल्याचे ओळखले. पोलिसांनी खुनाचा गुन्हा नोंदवून चार लोकांना अटक केली आहे. नवनीत प्रकाशन देशातील मोठी प्रकाशन संस्था अाहे.