पंढरीतील संतोष अधटराव यांची धारदार शस्त्राने निर्घृण हत्या

पंढरपूर येथील पुंडलिक मंदिर समितीचे सदस्य व आदिम विकास परिषदेचे नागेश अधटराव यांचे बंधु संतोष चंद्रकांत अधटराव (वय 43), रा. हनुमान मैदान, कोळी गल्ली, पंढरपूर यांची मोहोळ तालुक्यातील शेजबाभुळगावच्या शिवारात अज्ञात आरोपींनी धारदार शस्त्राने निर्घृण  हत्या केल्याची घटना घडली आहे.


काल दि. 25 आॅक्टोबर रोजी दुपारी घराबाहेर पडलेले संतोष अधटराव हे रात्री सुध्दा घरी न आल्याने त्यांच्या कुटूंबियांनी पंढरपूर शहर पोलिसांना याबाबत कळलिले होते. पंढरपूर शहर पोलिस याबाबत तपास करत असतानाच मोहोळ तालुक्यातील शेजबाभुळगावच्या शिवारात एकाचा धारदार शस्राने वार करून खुन झाल्याची माहिती पोलिसांना मिळाली. या मृतदेहाची शहानिशा केली असता हा मृतदेह संतोष अधटराव यांचा असल्याचे निष्पन्न झाले.


अज्ञात आरोपींनी धारदार शस्त्राने वार करून हा खुन केल्याचे स्पष्ट झालेय. हा खुन कोणी व का केला याचा तपास पोलीस घेत आहेत. दरम्यान या घटनेमुळे पंढरपूर शहरात खळबळ उडाली आहे.
संतोष अधटराव यांच्या पश्चात पत्नी, एक मुलगा, दोन मुली, व एक बंधु असा परिवार आहे.