पुणे सोलापूर राष्ट्रीय महामार्गावर उरुळी कांचन (ता. हवेली) ग्रामपंचायत हद्दीत तीन वाहनांचा झालेल्या विचित्र अपघातात एकाचा मृत्यू झाला आहे. ही घटना आज शुक्रवारी पहाटे पाच वाजण्याच्या सुमारास घडली आहे.
अपघातात मृत झालेल्या व्यक्तीचं नाव समजू शकले नसून या अपघातात तीनही वाहनांचे मोठ्या प्रमाणात नुकसान झाले आहे.
एक कंटेनर हा पुण्याच्या बाजूने निघाला होता. यावेळी एलाईट चौक आणि तळवडी चौक या दोन्ही चौकांच्यामध्येच कंटेनरला पाठीमागून आलेल्या एका कंटेनरला जोरदार धडक दिली. या धडकेत कंटेनर हा दुभाजकावरून सोलापूरच्या बाजूला जाणाऱ्या रस्त्यावर आला. त्याचवेळी सोलापूरच्या दिशेने उभ्या असलेल्या एका चारचाकी गाडीला जाऊन हा कंटेनर धडकला. यामध्ये चारचाकी गाडीचे व कंटेनरचेही मोठ्या प्रमाणात नुकसान झाले आहे.
सदर घटनेची माहिती मिळताच उरुळी कांचन येथील कस्तुरी प्रतिष्ठानच्या सदस्यांनी व ग्रामस्थांनी तात्काळ रुग्णवाहिका उपलब्ध करून दिली. जखमींना तात्काळ उपचारासाठी उरुळी कांचन येथील खाजगी रुग्णालयात दाखल करण्यात आले आहे. पाच मिनिटाच्या अंतरावर लोणी काळभोर पोलीस ठाणे अंतर्गत उरुळी कांचन पोलीस दुरक्षेत्र असून तरीही पोलीस आले नसल्याने तब्बल अर्धा तास या अपघातग्रस्तांना मदत मिळाली नाही. त्यामुळे अपघात झालेल्या ठिकाणी वाहने व वाहतूक कोंडी मोठ्या प्रमाणात झाली होती.
