मुंबई:
सीएसएमटी ते करमाळी दरम्यान सुरू करण्यात आलेल्या तेजस एक्सप्रेसच्या पहिल्याच प्रवासात चोरट्यांनी ‘हाथ की सफाई’ केली आहे. चोरट्यांनी तेजसमधील शेकडो हेडफोन्स लंपास करतानाच एलईडी स्क्रीनची नासधूस केल्याची धक्कादायक माहिती समोर आली आहे.
मुंबई ते कोकणचा प्रवास जलद आणि सुखकर व्हावा यासाठी तेजस एक्सप्रेसच्या सीएसएमटी ते करमाळी सेवेस सोमवारी हिरवा झेंडा दाखविण्यात आला. भारतातील सर्वात वेगवान एक्सप्रेस असलेल्या या गाडीत अत्याधुनिक सुविधा देण्यात आल्या आहेत. विमानात असतात तशाच सुविधा या गाडीत आहेत. प्रवाशांना प्रवासा दरम्यान गाणी ऐकण्यासाठी हेडफोन्स आणि चित्रपट पाहण्यासाठी प्रत्येक सीटच्यापाठी एलईडी स्क्रीनही लावण्यात आली आहेत. मात्र चोरट्यांनी करमाळी ते सीएसटीएम या परतीच्या प्रवासात शेकडो हेडफोन्स लंपास केले आहे. सीटमागचे एलईडी स्क्रीनही चोरण्याचा चोरट्यांनी प्रयत्न केला. मात्र ते चोरता येणे शक्य नसल्याने त्याची नासधूस केल्याचेही आढळून आल्याने रेल्वे पोलीसही चक्रावून गेले असून ‘हाथ की सफाई’ करणाऱ्या या चोरांचा पोलिसांनी शोध सुरू केला आहे. दरम्यान तेजसमध्ये नवीन हेडफोन्स आणि एलईडी स्क्रीन बसविण्याचे काम सुरू करण्यात आल्याचे रेल्वेने स्पष्ट केले.
दरम्यान, या आधी मुंबईत तेजस एक्सप्रेस आणताना अज्ञात इसमाने दगडफेक केल्याने तेजसच्या खिडकीच्या काचा फुटल्या होत्या. तर तेजसमधील अस्वच्छतेवर प्रवाशांनी बोट ठेवले होते. प्रसाधनगृहांमधील अस्वच्छता, रेल्वे कर्मचाऱ्यांकडून सेवा न मिळणे, खाद्यपदार्थ वेळेत न मिळणे अशा समस्यांना तोंड द्यावे लागल्याने प्रवाशांनी संताप व्यक्त केला होता.
पंढरपूर लाईव्ह वर आपल्या व्यवसायाची जाहिरात द्या.. अल्पदरात!!
