मुंबई मिरर। अहमदाबाद
१५० वर्षांपूर्वी ब्रिटिशांनी लादलेल्या सध्याच्या भारतीय शिक्षण व्यवस्थेतील त्रुटींचा पाठ वाचत, राष्ट्रीय स्वयंसेवक संघ आता ही शिक्षण पद्धतीच बदलण्याचा विचार करत आहे. त्याऐवजी भारतातील प्राचीन अशी ‘गुरुकुल’ शिक्षण पद्धती पुन्हा भारतात रुजविण्याच्या दृष्टीने एक पाऊलही टाकण्यात आले आहे. ही गुरुकुल शिक्षण पद्धती राबवत असलेले आरएसएसचे भारतीय शिक्षण मंडळ (बीएसएम) सध्याच्या १००० गुरुकुलची संख्या वाढवून आणखी ५०० नवीन गुरुकुल स्थापन करणार आहे.
या नव्या गुरुकुल शिक्षण पद्धतीची सुरुवात गुजरात या राज्यापासूनच होणार आहे. शतकानुशतकांची ही पारंपरिक शिक्षण पद्धती संपूर्ण भारतात पुनर्जिवित करण्यासाठी नुकतेच अहमदाबाद येथील साबरमतीमधील हेमचंद्राचार्य संस्कृत गुरुकुलममध्ये एका नियोजनपर कार्यशाळाचे आयोजन केले गेले. सात दिवसांच्या या कार्यशाळेचा उद्देश गुरुकुल पद्धतीचे ब्लू प्रिंट तयार करण्याचा होता. गुरुकुल शिक्षण पद्धती संपूर्ण भारतात राबवायची तर तितके प्रशिक्षित ‘आचार्य’ असण्याची गरज लक्षात घेऊन पुढील ५ वर्षांमध्ये ५०० शिक्षक तयार करण्याचे ध्येयही समोर ठेवण्यात आले आहे.
या कार्यशाळेवेळी गुरुकुलचा धर्माशी कोणताही संबंध नसल्याचं आरएसएसची बीएसएम ही संघटना सांगण्यास विसरली नसून बीएसएमचे राष्ट्रीय संघटन मंत्री आणि संघाचे पूर्णकालीन प्रचारक मुकुल कांतिकर यांनी सांगितले की, ”पूर्वी गुरुकुल पद्धती अस्तित्वात असताना कित्येक शतके अखंड भारताचे जगावर वर्चस्व होते. मात्र ब्रिटीश शिक्षण पद्धती भारतात आल्यानंतर शिक्षणाचा स्तर खालावत गेला. सध्याच्या या पुस्तक केंद्रीत शिक्षण पद्धतीमुळे शिक्षणाऐवजी केवळ स्पर्धा आणि नैराश्य वाढत आहे. विद्यार्थ्यांच्या आत्महत्येच्या घटनांमध्येही वाढ होत आहे. ” सध्याची शिक्षण पद्धती ही १५० वर्षांपूर्वी ब्रिटीशांनी भारतावर थोपविली असल्याचं आरएसएसने म्हटलं आहे.
