डॉ. माधवी आमडेकर, लंडनलंडन मराठी संमेलनाच्या (एलएमएस २०१७) निमित्ताने महाराष्ट्र मंडळ लंडनचा ८५वा वर्धापन सोहळ्यानिमित्त विविध कार्यक्रमांचे आयोजन करण्यात आले आहे.
‘एलएमएस’च्या अध्यक्षस्थानी पूर्व इंग्लंडच्या नौदलाचे प्रादेशिक कमांडर कमोडोर डेविड एलफोर्ड होते. यावेळी पीएमजी ज्वेलर्सचे सौरभ गाडगीळ, हनुमंत गायकवाड, अभिनेते मोहन आगाशे, सयाजी शिंदे, लेखिका मीना प्रभू, डॉ. सतीश देसाई, सचिन ईटकर, ऍड. प्रताप प्ररदेशी, रवी चौधरी यांच्यासह विविध क्षेत्रातील मान्यवर उपस्थित होते. महाराष्ट्र टाइम्स या संमेलनाचा मीडिया पार्टनर आहे.
महाराष्ट्र मंडळला ८७ वर्षे पूर्ण झाल्यामुळे विविध सांस्कृतीक कार्यक्रमांचे आयोजन करण्यात आले आहे. दीप प्रज्ज्वलनाने कार्यक्रमाच्या सुरुवात झाल्यानंतर ढोल-ताशांचा गजर, गणेश वंदना, जय महाराष्ट्र जयघोष व पोवाड्यांनी परिसर दुमदुमून गेला होता.
लंडनमधील मराठी बांधवांनी या कार्यक्रमासाठी एकच गर्दी केली होती. शाहीर नंदेश उमाप यांच्या पोवाड्यानंतर उपस्थितांनी टाळ्यांचा कडकडाट झाला. अच्युत गोडबोले यांनी सादर केलेल्या नादवेध कार्यक्रामाने उपस्थितांची मने जिंकली. यंदा श्रीमंत दगडूशेठ हलवाई ट्रस्टच्या गणेशोत्सवाचा शतकोत्तर रौप्य महोत्सवी वर्ष असल्यामुळे या सोहळ्याच्या आग्रहाचे निमंत्रण देण्यासाठी पुण्याहून लंडनला ट्रस्टी आले आहेत. त्यांनी युकेवासीयांना महाराष्ट्र मंडळ लंडन आग्रहाचे निमंत्रण दिले आहे.
कार्यक्रमावेळी ‘एलएमएस’च्या स्मरणिकेचे प्रकाशन करण्यात आले. यामध्ये विविध मान्यवरांनी लेख लिहीले आहेत. अध्यक्ष सुशील रापतवार, वैशाली मंत्री, अनिल नेने व गोविंद काणेगावकर यांनी सूत्रसंचालन केले.
