हैदराबाद
हैदराबादजवळील राष्ट्रीय महामार्ग १६३ वर सोमवारी जेसीबी मशीनच्या सहाय्याने बेकायदेशीरपणे एक खड्डा खोदण्यात आला. अचानकपणे खोदण्यात आलेल्या या खड्ड्याबाबत स्थानिक लोकांपासून ते नेत्यांपर्यंत सर्वांनाच आतुरता होती. या खड्ड्यात आता शिवलिंग सापडणार म्हणून सगळ्यांचीच उत्सुकता शिगेला पोहोचली होती. हे सगळं घडत होतं, एका व्यक्तीच्या स्वप्नामुळे!
हैदराबादपासून ८० किमी अंतरावरील तेलंगणामधील जनगावमधील ही घटना आहे. वारंगलपासून हैदराबादला जोडणाऱ्या राष्ट्रीय महामार्ग १६३ वर मध्यभागीच १५ फूट खोल खड्डा खोदला गेला. या जागी खोदकाम केलं जावं म्हणून जनगावातील मनोज गेली तीन वर्षं भर देत होता. त्याने त्याच्या स्वप्नात या जागेवरच शिवलिंग पाहिल्याचं तो साऱ्यांना सांगायचा. स्थानिकांनी दिलेल्या माहितीनुसार, मनोज जेव्हाही या जागेच्या आसपास येत असे, तो शरीरात काही संचारल्यासारखे हलू-डुलू लागे. दर सोमवारी तो इथे येऊन पूजाही करायचा. गेल्या तीन वर्षांपासून महाशिवरात्रीच्या दिवशी इथे येऊन खोदकाम करण्यासाठी मनोजचा पाठपुरावाही सुरू होता. अखेर गावकऱ्यांची समजूत काढण्यात मनोजला यश मिळालं. गावातील लोक, स्थानिक नेते आणि सरपंच सारीच मंडळी त्या जागी खोदकाम करण्यासाठी तयार झाली. खोदकामासाठी जेसीबी मशिन मागविण्यात आली. तत्पूर्वी महामार्गाच्या दोन्ही बाजूस कमीत कमी १ किमी अंतरापर्यंत वाहतूक थांबविण्यात आली. आणि महामार्गाच्या मधोमध १५ बाय ८ फूटाचा खड्डा खोदण्यात आला.
खोदकामाला सुरूवात होताच सुरूवातीला मनोज सांगत होता की, १० फूटापर्यंत खोदावं, शिवलिंग सापडेल. उत्सुकतेपोटी १५ फूट खोल खड्डा केला गेला. पण शिवलिंग मात्र सापडले नाहीच. उलट या प्रकरणामुळे महामार्गाचे नुकसान झाल्यामुळे पोलिसांनी मनोजसह एका स्थानिक नेत्याला ताब्यात घेऊन बेकायदेशीर खोदकाम केल्याची तक्रार दाखल केली आहे. खोदकामाला सुरूवात करण्यापूर्वी एका स्थानिक पोलिस अधिकाऱ्याने विरोधही केला होता. अधिकाऱ्याच्या मते, ‘सुरूवातीला १० फूट, नंतर १५ फूट, नंतर पुन्हा आणखी २ फूट खड्डा खणण्यासाठी मनोज सांगत होता. तसे केले असते तर या महामार्गावर विहिरीच तयार झाली असती.’
सर्वात जलद, सर्वात लोकप्रिय! पंढरपूर लाईव्ह वर आपल्या व्यवसायाची जाहिरात द्या.. अल्पदरात!! मुख्य संपादक-भगवान वानखेडे संपर्क- 8308838111
