मुंबई
केंद्रातील आणि राज्यातील सत्तेसाठी शिवसेनेचा टेकू घेऊनही त्यांना पुरेसे महत्त्व न देणाऱ्या भारतीय जनता पक्षाला राष्ट्रपतीपदाच्या निवडणुकीची गणितं जुळवण्यासाठी अखेर नमतं घ्यावं लागलं आहे. त्याचाच भाग म्हणून भाजपचे राष्ट्रीय अध्यक्ष अमित शहा ‘मातोश्री’ निवासस्थानी जाऊन शिवसेनेचे पक्षप्रमुख उद्धव ठाकरे यांची भेट घेणार आहेत. उद्धव-शहा यांच्या या भेटीबद्दल राजकीय वर्तुळात
प्रचंड उत्सुकता आहे.
राज्यात व केंद्रातील सत्तेत मांडीला मांडी लावून बसलेल्या शिवसेना-भाजपमध्ये सुरुवातीपासूनच प्रचंड तणाव आहे. दोन्ही पक्ष एकमेकांवर कुरघोडी करण्याची संधी सतत शोधत असतात. भाजपच्या केंद्रीय नेतृत्वाच्या आशीर्वादामुळं भाजप नेत्यांनीही गेल्या काही वर्षांपासून शिवसेनेला अंगावर घेण्याची रणनीती आखली आहे. त्यामुळं दोन्ही पक्षातील तणाव वाढतच आहे. राज्यातील शेतकरी आंदोलनाला शिवसेनेनं दिलेल्या सक्रिय पाठिंब्यामुळं त्यात भर पडली आहे. मात्र, राष्ट्रपतीपदाच्या निवडणुकीमुळं भाजपला पुन्हा एकदा नमतं घ्यावं लागलं आहे.
भाजपला हवा असलेला राष्ट्रपतीपदाचा उमेदवार सहज निवडून आणण्यासाठी हक्काच्या काही मतांची गरज आहे. एनडीएचे सर्व घटक पक्ष व विरोधी गटातील काही पक्षांच्या मदतीनं भाजपला हा आकडा गाठता येऊ शकतो. मात्र, भाजपवर सतत नाराज असलेल्या शिवसेनेकडून कोणताही दगाफटका होऊ नये, याची काळजी केंद्रीय नेतृत्व घेताना दिसत आहे. त्यामुळंच शहा यांनी थेट ‘मातोश्री’वर जाण्याचा निर्णय घेतल्याचं बोललं जातं.
शहा-उद्धव यांच्या या भेटीत राष्ट्रपतीपदाच्या उमेदवाराच्या नावाची चर्चा होण्याची शक्यता आहे. त्याचबरोबर, शिवसेना-भाजपमधील तणाव कमी करता येतो का, याचीही चाचपणी दोन्हीकडून होईल, असंही बोललं जात आहे.
