मुंबई अहमदाबाद महामार्गावरती दोन आरोपींच्या ताब्यातून एक गावठी बनवटीचे पिस्तूल व दोन जिवंत काडतुसे जप्त करण्यात वालीव पोलिसांना यश आले आहे. महामार्गावरती क्वार्टर डेक हॉटेलच्या गेट समोर वालीव पोलिसांनी शुक्रवारी दुपारी चारच्या सुमारास दोन संशयित व्यकतींना ताब्यात घेतले.
आरोपीच्या ताब्यात एक गावठी बनावटीचे पिस्तूल, दोन जिवंत काडतुसे, रोख रक्कम व इतर कागदपत्रे असा एकूण ७२ हजार १२० रुपये किमतीचा मुद्देमाल आढळून आला आहे. सत्यप्रकाश रामबच्चन यादव (२४) व धीरेंद्र लोदाई पाल (२८) अशी या दोन आरोपींची नावे असून ते दोघे उत्तर प्रदेश मधील आजमगड येथे राहणारे आहेत. वालीव पोलिसांनी गुन्हा दाखल केला आहे. दोन्ही आरोपींनी सदर शस्त्र कोणाला विकण्यासाठी आणले होते याचा पोलीस शोध घेत आहेत.
