मुंबई: खार पोलिस ठाण्यात कार्यरत असलेले पोलिस निरीक्षक ज्ञानेश्वर गणोरे यांच्या पत्नी दीपाली यांची वाकोला येथील राहत्या घरी चाकूने भोसकून हत्या करण्यात आल्याची घटना बुधवारी सकाळी उघडकीस आल्याने खळबळ उडाली आहे. गणोरे यांचा मुलगा सिद्धांत हा या घटनेनंतर बेपत्ता असून दीपाली यांच्या मृतदेहाशेजारी ‘टायर्ड ऑफ हर, कॅच मी अॅण्ड हँग मी’ असे रक्ताने लिहिलेले आढळून आल्याने ही हत्या सिद्धांतने केली असावी, असा पोलिसांचा संशय आहे.
सिद्धांतचा मोबाइल फोन घरातच सापडला असून, घरातील काही रक्कम गायब आहे. त्यामुळे दीपाली गणोरे यांची हत्या सिद्धांतने केल्याचा पोलिसांचा संशय आहे. दीपाली यांच्या मृतदेहाशेजारी स्माइलीचे चित्र काढत चाकूही ठेवण्यात आला होता. सिद्धांत सापडल्यानंतरच या हत्येमागचे गूढ उघडकीस येईल, असे वरिष्ठ पोलिस निरीक्षक महादेव वावळे यांनी सांगितले.
सिद्धांत वांद्रे येथील नॅशनल कॉलेजमध्ये विज्ञान शाखेच्या शेवटच्या वर्षात शिकत होता. तो पूर्वी इंजिनीअरिंग करत होता. मात्र, इंजिनीअरिंगचा अभ्यास अवघड जात असल्याने त्याने सायन्समध्ये प्रवेश घेतला होता. अभ्यासात कमी पडत असल्यामुळे सिद्धांतचे आईशी कायम खटके उडायचे. या रागातून सिद्धांतने हे टोकाचे पाऊल उचलले असावे, असा संशय पोलिसांना आहे.
मंगळवारी सकाळी ११ वाजता पोलिस ठाण्यात जाण्यासाठी घराबाहेर पडले होते. रात्री ११च्या सुमारास काम संपवून ते घरी गेले. मात्र, वारंवार दार ठोठावूनही कोणीच दार उघडले नाही. मोबाइलवर संपर्क करण्याचा प्रयत्न करूनही पत्नीकडून कोणताच प्रतिसाद मिळाला नाही. मुलगा आणि पत्नी बहुदा बाहेर गेले असावेत, असे वाटून गणोरे यांनी रात्रीचे २ वाजेपर्यंत वाट पाहिली. त्यानंतर अस्वस्थ झालेल्या गणोरेंनी पुन्हा घराकडे धाव घेतली. घराबाहेरील चप्पल ठेवण्याच्या जागी मुलगा आणि पत्नीची चप्पल दिसून आली. त्याच ठिकाणी घराची चावीही त्यांना आढळली. त्यानंतर त्यांनी घरात प्रवेश केला असता, बेडरूममध्ये पत्नी दीपाली रक्ताच्या थारोळ्यात पडली असल्याचे दिसले. मुलगा सिद्धांत हा बेपत्ता होता. या घटनेची माहीत गणोरे यांनी पोलिस नियंत्रण कक्षाला दिल्यानंतर वाकोला पोलिसांनी घटनास्थळी धाव घेतली.
ज्ञानेश्वर गणोरे यांचीही चौकशी?
दीपाली यांच्या हत्येप्रकरणी वाकोला पोलिस ज्ञानेश्वर गणोरे यांचीही चौकशी करणार आहेत. हत्येच्या दिवशीचा ज्ञानेश्वर गणोरे यांचा दिनक्रम आणि वस्तुस्थिती पोलिस पडताळून पाहणार आहे. हत्या झालेल्या इमारतीत सीसीटीव्ही कॅमेरे नसल्यामुळे तपासात अडचणी येत आहेत. त्यामुळे सर्व बाजूंनी पोलिसांचा तपास सुरू आहे.
पंढरपूर लाईव्ह वर आपल्या व्यवसायाची जाहिरात द्या.. अल्पदरात!!
