वादग्रस्त बोरिवली येथील अजित पवार ज्युनिअर कॉलेजच्या अडचणीत आणखी भर पडली आहे. या कॉलेजातील विद्यार्थी वाढावेत याकरिता कॉलेजकडून कोचिंग क्लासेसना प्रत्येक विद्यार्थ्यामागे पाच हजार रुपये दिले जात असल्याची धक्कादायक माहिती हाती आली आहे. दरम्यान, या कॉलेजातील विद्यार्थ्यांना लवकरच इतरत्र समावून घेतले जाईल, असे शिक्षण उपसंचालकांनी स्पष्ट केले आहे.
कॉलेजातील विद्यार्थी संख्या वाढवावी यासाठी कॉलेजाकडून तीन ते चार कोंचिग क्लासबरोबर संगनमत करण्यात आले होते. त्यासाठी प्रत्येक विद्यार्थी मागे पाच ते सात हजार रुपये दलाली देऊ केली जात असल्याची माहिती एका कोचिंग क्लास धारकाने नाव न छापण्याच्या अटीवर दिली.
पालकांनी बुधवारी शिक्षण उपसंचालकांकडे धाव घेत योग्य तो निर्णय घेण्याची मागणी केली आहे. विद्यार्थ्यांच्या भवितव्यावर याचा परिणाम होऊ देणार नाही, असे आश्वासन उपसंचालक बी. बी. चव्हाण यांनी दिले. सर्व विद्यार्थ्यांना दुसऱ्या कॉलेजात प्रवेश देणार असून कॉलेजच्या आजूबाजूच्या परिसरातील कॉलेजांशी संपर्क साधला आहे. दोन दिवसांत या कॉलेजांची यादी तयार करण्यात येणार आहे. गुरुवारी एक बैठक घेण्यात येणार असून त्यानंतर ही यादी जाहीर करण्यात येईल, असे चव्हाण यांनी स्पष्ट
केले.
अजित पवारांशी संबंध नाही
बोरिवली येथील वादग्रस्त ठरलेल्या नामदार अजित पवार ज्युनिअर कॉलेजच्या राष्ट्रवादीचे नेते अजित पवार यांच्याशी कोणताही संबंध नाही. शाळने अजित पवार यांचे नाव वापरले असून यासंदर्भात पवार यांनी स्वत: शिक्षणमंत्र्यांकडे तक्रार केली आहे.
पंढरपूर लाईव्ह वर आपल्या व्यवसायाची जाहिरात द्या.. अल्पदरात!!
