सीबीआयच्या एफआयआरमध्ये एका ब्रिगेडिअरच्याही नावाचा समावेश आहे. पण आरोपींच्या यादीत त्याच्या नावाचा समावेश नाही. वरिष्ठ अधिकाऱ्यांच्या संगनमताने लष्करी मुख्यालयात गेल्या अनेक दिवसांपासून हे रॅकेट सुरू असल्याचा सीबीआयला संशय आहे. सीबीआयच्या एफआयआरमध्ये लाचेच्या रकमेसाठी हवाला माध्यमाचा वापर होत असल्याचा उल्लेख करण्यात आला आहे.

सीबीआयने लष्कराच्या मुख्यालयात कार्यरत असलेले लेफ्टनंट रंगनाथ सुवर्णमणी मोनी, हैदराबादचे लष्करी अधिकारी पुरूषोत्तम, गौरव कोहली आणि बेंगळुरूमध्ये कार्यरत असलेले लष्करी अधिकारी एस. सुभाष यांच्याविरोधात गुन्हा दाखल केला आहे. लेफ्टनंट मोनी हे कोहली आणि पुरूषोत्तम यांच्या मदतीने अधिकाऱ्यांच्या बदल्या करत असत.

दरम्यान, महाराष्ट्रातही पोलिस अधिकाऱ्यांच्या बदलीसाठी कार्यरत असलेल्या रॅकेटचा भंडाफोड शुक्रवारी करण्यात आला आहे. याप्रकरणी चार जणांविरोधात गुन्हा दाखल करण्यात आला आहे.