ग्राहकांना व स्नॅपडीलला गंडा घालणाऱ्या कामगारांना पोलिसांनी अटक केली आहे. या कामगारांकडून मोबाइल, लॅपटॉप, घड्याळ, परफ्यूम, गॉगल, कपडे असा ७ लाख ७४ हजार ६४७ रुपयांचा मुद्देमालही जप्त करण्यात आला आहे. इम्रान मुसा शेख (२०) आणि मोहम्मद नजिब मोहमद मुबिन (२३) अशी या अटक केलेल्या कामगारांची नावे आहेत.
स्नॅपडील या ई कॉमर्स कंपनीचे भिवंडी, माणकोली नाका येथील श्रीगणेश कॉम्प्लेक्समध्ये वेअरहाऊस आहे. ग्राहकांनी ऑनलाइन वस्तूंची ऑर्डर केल्यानंतर त्या वस्तूंचा पुरवठा करण्याचे येथून होते. या कंपनीच्या पॅकिंग विभागात ७० कर्मचारी आहेत. परंतु मागविलेल्या वस्तूऐवजी हलक्या प्रतीचा माल किंवा मॅगी, साबण, शॅम्पू पाठवणे, चांगल्या मोबाइलऐवजी साधा मोबाइल मिळत असल्याच्या तक्रारी अनेक ग्राहकांनी केल्या होत्या. या कंपनीच्या दिल्लीतील मुख्य कार्यालयापर्यंत हे प्रकरण गेले होते.
या तक्रारींच्या अनुषंगाने कंपनीच्या दिल्लीतील वरिष्ठ अधिकाऱ्यांनी भिवंडीतील वेअरहाऊसमध्ये धडक देत चौकशी केली. यातून धक्कादायक माहिती समोर आली. पॅकिंग विभागातील इम्रान मुसा शेख आणि मोहम्मद नजिब मोहमद मुबिन दोघेही रा. भिवंडी हे महागड्या वस्तूंची ऑनलाइन ऑर्डर आल्यानंतर कमी किमतीच्या वस्तूंची ऑर्डर वेगवेगळ्या नावाने देत होते. वेअरहाऊसमध्ये वस्तू वितरणासाठी आल्यांनतर पॅकिंग करताना महागड्या वस्तूंच्या पॅकिंगवर त्यांनी ऑर्डर केलेल्या हलक्या वस्तूंची इनव्हॉइस स्लिप ते चिकटवत असत. यानंतर महागडे वस्तूचे पॅकिंग ते स्वतःच्या पत्यावर पाठवत.
ग्राहकांनी ऑनलाइन खरेदी केलेल्या महागड्या वस्तूंऐवजी हलक्या प्रतीच्या वस्तू किंवा बनावट वस्तू वितरित करून कंपनीचे नाव खराब केल्याचा ठपका या आरोपींवर ठेवण्यात आला आहे. आरोपींचा बनवाबनवीचा हा प्रकार ऑगस्ट २०१५ पासून सुरू होता असे पोलिस तपासात उघड झाले
सर्वात जलद, सर्वात लोकप्रिय! पंढरपूर लाईव्ह वर आपल्या व्यवसायाची जाहिरात द्या.. अल्पदरात!! मुख्य संपादक-भगवान वानखेडे संपर्क- 8308838111
