राष्ट्रवादीचे नेते, नगरसेवकांविरोधात “मोक्का” अंतर्गत गुन्हे दाखल

पंढरपूर Live 15 NOVEMBER 2017

याबाबत सूत्रांनी दिलेल्या माहितीनुसार, वरकुटे मलवडी (ता. माण) येथे खंडणीसाठी गिरिराज रिन्युएबल्स कंपनीच्या जागेत घुसून जेसीबी मशिनच्या सहाय्याने बांधकाम पाडण्याची घटना बुधवार (दि.२५) ऑक्‍टोबरला घडली होती. या प्रकरणी शेखर गोरे यांच्यासह १५ ते २० जणांवर गुन्हा दाखल झाला होता. त्यात काही जणांना अटकही करण्यात आली होती.

या गुन्ह्याच्या तपासादरम्यान, संशयित लोक खंडणीसाठी दहशत निर्माण करणे, दरोडा टाकून वाहने पळविणे, अशा प्रकारचे गुन्हे करून आर्थिक फायदा करून टोळी चालवत असल्याचे समोर आले. या प्रकारामुळे शेखर गोरे यांच्या टोळीविषयी परिसरात दहशत निर्माण झाली होती. त्यामुळेकोल्हापूरचे विशेष पोलिस महानिरिक्षक विश्‍वास नांगरे पाटील यांच्या मान्यतेने अधीक्षक संदीप पाटील यांनी दिलेल्या सूचनेनुसार म्हसवडचे सहाय्यक निरिक्षक मालोजीराव देशमुख यांनी शेखर गोरे टोळी विरूध्द संघटीत गुन्हेगारी कायद्यानुसार (मोका) राष्ट्रवादीचे नेते शेखर भगवान गोरे (रा. बोराटवाड, ता. माण), नगरसेवक संग्राम अनिल शेटे (वय २३, रा. म्हसवड), सतीश आनंदा धडांबे (वय ३६), सागर शंकर जाधव (वय ३०, दोघे महिमानगड) यांच्यासह २० जणांवर गुन्हा दाखल केला आहे. 

खंडणीसाठी दहशत निर्माण करून आर्थिक गुन्हेगारी जिल्ह्यात वाढू लागली आहे. याला आळा घालण्यासाठी अशा गुन्हेगारांवर मोका कायद्यानुसार कारवाई करण्याचे आदेश पोलिस अधीक्षक संदीप पाटील यांनी पोलिस अधिकाऱ्यांना दिले होते. म्हसवड पोलिस स्टेशन हद्दीत अशा प्रकारचे गुन्हे करणाऱ्यांवर म्हसवड पोलिस स्टेशनचे सहायक निरिक्षक व स्थानिक गुन्हे अन्वेषण विभागाचे पद्‌माकर घनवट लक्ष ठेऊन होते. या गुन्ह्याचा तपास दहिवडीचे पोलिस उपअधीक्षक यशवंत काळे यांच्याकडे देण्यात आला आहे.