2 डिसेंबरपासून नाभिक समाज करणार मुख्यमंत्र्यांविरुध्द राज्यभरात रास्ता रोको…

पंढरपूर Live 23 NOVEMBER 2017
नाभिक समाजाबद्दल आक्षेपार्ह विधान केल्याप्रकरणी मुख्यमंत्री देवेंद्र फडणवीस यांना रोषाला सामोरे जावे लागत आहे. नाभिक संघटनेतर्फे त्यांच्याविरोधात २ डिसेंबरपासून राज्यभरात रास्ता रोको करण्यात येणार आहे. तसेच १३ डिसेंबरला नागपूरमध्ये ११ हजार लोक मुंडण करून त्यांना केस भेट देणार आहेत.


पुणे जिल्ह्यातील दौंड तालुक्यातील पाटस येथे भीमा सहकारी साखर कारखान्याच्या गळीत हंगामाच्या शुभारंभ कार्यक्रमात फडणवीस यांनी काँग्रेस-राष्ट्रवादी आघाडी सरकारच्या कारभारावर टीका करताना ‘एक न्हावी चार-पाच गिऱ्हाईकांची‌ अर्धी-अर्धी हजामत करतो आणि त्यांना बसवून ठेवतो’, असे उदाहरण दिले होते. या विधानामुळे नाभिक समाजाच्या भावना दुखावल्या असून राज्यात ठिकठिकाणी मुख्यमंत्र्यांचा निषेध करण्यात येत आहे. त्यांनी माफी मागावी अशी मागणी होत असून नाभिक संघटना आक्रमक झाली आहे. २ डिसेंबरपासून राज्यभर रास्ता रोको करण्यात येणार आहे. तसेच १३ डिसेंबरला नागपूरमध्ये सामूहिक मुंडण आंदोलन करण्यात येणार आहे. त्यात ११ हजार समाजबांधव सहभागी होणार असून मुंडणानंतर केस मुख्यमंत्र्यांना भेट देण्यात येणार आहेत, अशी माहिती संघटनेने दिली.